tusarnaartitsinerit marluk
Zikazakkut ilulissialerput
Rockimik nipilersortartut nuannarisaalluartut Zikaza sapaatip akunnerata naanerani Ilulissani nipilersussapput
Zikazakkunni erinarsortoq Siiva Fleischer inunngorfimmini Ilulissat tallimanngornermi arfininngornermilu nipilersussaaq neriniartarfimmi Naleqqami nipilersussagamik. Taamaasillutik Zikazakkut 2013-mi tusarnaartitseqattaarnerit naggaserneqartussanngorput.
Zikazakkut kingullermik Ilulissani nipilersorput aggustip 30-at aasap naalera malunnartinniarlugu Zikazakkut, Siissisoq aamma Asuki nipilersortinneqarmata.
Maanna Zikazakkut Ilulissani nipilersornissaminnut piareeqqipput tallimanngornermi arfininngornermilu nipilersornernik neriniartarfik Naleraq aaqqissuisuulluni. Tallimanngornermi unnukkut matoqqasumik Zikazakkut nipilersussapput tamanullu ammasumik arfininngornermi nipilersussallutik.
Ninop tusarsaalernera
- Ilulissani nipilersornissatsinnut qilanaaqaagut. Aggustimi assut ilassilluarneqarput naatsorsuutigaarpullu inuit qiimasorsuit naapikkumaarluginaasit, Siiva Fleischer oqarpoq.
Taassuma nipilersortarnera 1970-ikkunni Ilulissat katersortarfiani aallartippoq nipilersoqatigiinni ’The Lazy Fools’ikkuni siuuttuugami. Nipilersoqatigiit tumerparpaartuat Nino Fencker Thomsen aamma Ilulissaneersuuvoq taannali Nuummi nipilersoqatigiinni Nuutini peqataalerami tumerparpaartartutut tusarsaalerpoq Zikazakkunni ullumikkut nipilersoqataasartut Hans Jukku Noahsen aamma Nukannguaq Geisler tassani peqatigigamigit.
Maanna tassa Zikaza Ilulissani apperiaannanngorpoq unnukkut aqqarnup missaaniit ullaassakkut pingasunngulernerata tungaanut nipilersortassallutik.
Zikazakkut nipilersortui tassaapput: Siiva Fleischer, Hans Jukku Noahsen, Titken Jakobsen, Nukannguaq Geisler aamma Nino Fencker Thomsen.