WWF: Uulia taamaatinneqarli

USA-p aamma Canadap Issittumi uuliasiorluni qillerinerit tamaasa unitsippaat.

Verdensnaturfonden WWF-ip maanna Kalaallit Nunaat malinnaaqquaa.

- Tamatuma Kalaallit Nunaat isumassarsitillugu sinerissap avataani uulia aamma gassi taamaatillugu malinnaassasoq neriuutigaarput, WWF-imi siunnersuisuuneq, Mette Frost oqarpoq.

USA Canadalu unitsitsisut
Præsident Barack Obama aamma Canadamiut premierministeriat Justin Trudeau, ataatsimut nalunaaruteqarnerminni Issittup imartaani uuliasiorneq unitsinniarlugu nalunaarutigaat.

- USA Canadalu Issittumi uuliasiornertik unitsikkaat, Kalaallit Nunaat akuersissutinik nutaanik tuniniaavoq. Tamanna ineriartornermut nutaamut akerliullunilu uggornarluinnarpoq - uuliasiornissamut takorluugaq iluatsippat iluatsinngippalluunniit, Mette Frost isumaqarpoq.

Vittup Trump neriuuteqarfigigaa
Arctic Circlemi ataatsimiinnermi inuussutissarsiornermut nunanut allanullu naalakkersuisoq, Vittus Qujaukitsoq, Trumpip naalakkersuisunilu Issittumi uuliasiornermik ingerlatitseqqissasoq neriuutigalugu, sapaatip akunnerani kingullermi oqariartuuteqarpoq.

Atuaruk: Namminiilivinneq ima aningaasalersorneqassaaq

- WWF Verdensnaturfonden taamatut neriuuteqaqataanngilaq, Mette Frost oqarpoq.

- Kalaallit Nunaata aningaasaqarnikkut ineriartornissamik aamma nunap karsianut nutaanik isertitaqarnissamut pisariaqartitsinera paasisinnaavarput. Kisianni uuliasiornermut attuumassutillit navianarsinnaasut atoraanni ulorianartorsiorneq annertuvoq, ajutoornerup inuussutissarsiutit ullumikkut inuussutigineqartut aserorneqarsinnaanerat pissutigalugu.

Greenpeacep USA Canadalu nersualaarpaat
Kisianni maanna Barack Obamap Issittup imartaani uuliasiornissamut pilersaarutit unitsippai. Alloriarneq avatangiisinut illersuiniaqatigiiffiit nuannaarutigaat.

- Issittumi avatangiisinut aamma silap pissusianut juullimut tamanna tunissut assorsuaq nuannerluinnarpoq, Sune Scheller, Greenpeacemi suliniummut aqutsisoq oqarpoq.

WWF-ip aamma Trudeau Obamalu nersualaarpai
- USA-p Canadallu naalakkersuisui Issittumi pinngortitami ataqaigiiffiit assigineqanngitsut illersorniarlugit pingaarutilimmik alloriarput, tamakkulu sumiiffimmi inunnut najugaqartunut inuunermut pingaarutilimmik nerisaqartitsisuupput, taakkulu suliffissuit suliaqarnerinut silallu pissusiata allanngoriartorneranit ulorianartorsiortinneqaraluttuinnartuupput, Mette Frost oqarpoq.

Piiaaffiit aatsitassanut taarsiullugit
Kalaallit Nunaata nunami aatsitassarsiorfiit uuliamut taarsiullugu aallutarissagai, Verdensnaturfondenip kajumissaarutigaa.

- Piffissamut aningaasanullu tunngatillugu nunap qaani inuussutissarsiornernik nutaanik ineriartortitsinissamut atuinissaq pitsaanerusoq isumaqarpugut, aatsitassanut suliniutit pinngortitamut avatangiisinullu kinguneritinneqarsinnaasut tassani aqukkuminarnerummata, Mette Frost naggasiivoq.