Sunday, September 10, 2017 - 08:53

WWF-p inuiaqatigiit suleqatigerusuppai

Bo Øksnebjerg pinngortitamik illersuiniaqatigiiffimmut WWF-imut qullersaasoq, sapaatip akunnerata siuliani Nunatsinniippoq nungusaataanngitsumik pinngortitamik atuinissaq pillugu suliniaqatigiiffinnik, suliffeqarfinnik ingerlatsivinnillu assigiinngitsunik oqaloqateqaqattaarluni.
Assi.: Jørgen Schultz-Nielsen
Pinngortitami illersuiniaqatigiiffiup najukkami aaqqiissutissat naaperiutigineqartariaqartut isumaqarpoq. Taamaammat suliniaqatigiiffimmi qullersanngortup inuiaqatigiit kalaallit oqalliseqatigerusuppai.

Qaleralinniarnermi ajalusoornissaq pinngitsoortinneqarsinnaassasoq, nunarsuarmi avatangiisinik illersuiniaqatigiiffimmi WWF-imi qullersanngortup Bo Øksnebjergip neriuutigaa. Kalaallit Nunaanni pinngortitap tunniussinnaasaannut inuillu tamaani najugallit akornanni nungusaataanngitsumik atuisinnaaneq ilungersunartumik pingaarnertut suliassaasoq maanna isigaa. 

Bo Øksnebjerg illersuiniaqatigiiffimmi marsip aallaqqaataanni qullersanngornermi kingorna nammineerluni Kalaallit Nunaanni pinngortitaq kulturilu misigiumallugit ulluni makkunani Kalaallit Nunaanniippoq. Maaniinnini inunnut, suliniaqatigiiffinnut, ingerlatsivinnut suliffeqarfinnullu attaveqaatissanik pilersitsinermut atorpaa. 

– WWF-ip pinngortitap inuillu akornanni nungusaataanngitsumik aaqqissuussinernik nassaarniartarnissaq pingaartitarigamiuk, avatangiisinik illersuiniaqatigiiffinnit allarpassuarnit allaanerussutigaa. Aaqqiissutissaq pitsaanerpaaq qanoq isikkoqassanersoq taamaallaat anguneqarsinnaavoq, ikioqatigiilluta pitsaasumik oqaloqatigiissinnaagutta, Bo Øksnebjerg, 48-nik ukiulik oqarpoq, taanna uumassusilerisutut Københavnimi ilinniagaqarsimavoq. 

WWF 5 millioninik ilaasortaminik tunuliaqutaqarnermigut aamma suliffeqarfinnit aningaasaateqarfinnillu arlalinnit aningaasaliiffigineqartarnermigut avatangiisit pillugit oqallinnermut peqataasarpoq tusaaniarneqartarlunilu. Tamatumunnga minnerunngitsumik pissutaalluni inuit pinngortitami isumalluutinik atornerluileraangata ajornartorsiutinik aaqqiiniarluni piviusorsiortumik isiginneriaaseqarnini. 

– Periaasissatsinnik nutaamik suliaqaleruttorpugut, pitsaasumillu isiginneriaaseqarneq maani maluginiagara nuannaarutigeqaara. Kikkut tamarmik nungusaataanngitsumik periaaseqarnissaq pingaartittorujussuuaat. Imaassinnaavoq aalisartut kattuffiata KNAPKp oqaaseq »nungusaataanngitsumik atuinissaq« immaqa atorneq ajoraat, allatulli oqaatigisarlugu, Bo Øksnebjerg oqarpoq nangillunilu:

– KNAPK-mit aalajangersakkami pineqartoq tassaavoq, aalisarneq ima ingerlanneqassasoq, kinguaariit tulliuttut aamma aalisarsinnaasariaqarlutik. 

Qullersanngortumut akuersaassallugu pingaarutilik tassaavoq, nunat tamarmik immikkut ajornartorsiutiminnik isiginneriaaseqarlutillu aaqqiissutissaqartarmata. Taamaattumik WWF-imut aamma pingaaruteqarpoq, Nuummi inuttaqartuartumik allaffimmioqarnissaq, Kalaallit Nunaannik issittumilu suliassanik ilungersunartunik taamaallaat sammisaqartussamik.

– Kalaallimik pinngortitamik nungusaataanngitsumillu atuinissamik pingaartitsinngitsumik naapitaqanngilanga. Aamma maanga takkuteriarluta aaqqiissutissanik naalagarsiortitsinianngilagut. Aaqqiissutissat piumassuseqarluni oqaloqatigiinnikkut nungusaataanngitsumillu periaaseqarnikkut nanineqartariaqarput, Bo Øksnebjerg oqarpoq, erseqqissarlugulu aaqqiissutissamik nassaarniarnermi pinngortitap inuullu pisariaqartitai isiginiarneqartillugit aaqqiissutissap suunissaata aalajangiunnissaa ajornakusoorsinnaasarmat. 

Kalaallit Nunaanni suliassat ilungersunarnersaattut Bo Øksnebjergip maannakkorpiaq takusinnaasaa qularutissaanngilaq: Aalisarneq ingammillu qaleralinniarneq ernumanartoqartippai.

– Qaleralittassiissutit Pinngortitaleriffimmi uumassusilerisut innersuussutigisaannit amerlanerusarput. Ullutsinnilu qaleralinnik aalisapiluttoqarsimaneranik takussutissaqarluni. Saarullinniarneq 70-ikkunni ajalusoorpoq. Qaleralinniarneq taama pissanngitsoq neriuutigaara, qullersanngortoq ilungersunartumik nipeqarluni oqarpoq. 

Bo Øksnebjergip apeqqarissaarfigineqarnera Sermitsiaq avisiimi tamakkerlugu atuarsinnaavat. Aviisi digitaliusoq uani pisiariuk.

Seneste nyheder / Nutaarsiassat kingulliit