Ittoqqortoormiit
WWF nannunik alapernaarsuisumik atorfinitsitsivoq
Ittoqqortoormiini ullut tamaasa ullaakkut alapernaarsuisarnikkut qulakkeerneqassaaq meeqqat inersimasullu atuariartornerminni suliartornerminnilu nannunik naapitsisannginnissaat
Aggustip pingajuanniilli Ittoqqortoormiini ullaat tamaasa illoqarfimmi angalaartoqartarpoq qulakkeerniarlugu unnuap ingerlanerani nannunik illoqarfimmut pisoqarsimannginnera, imaluunniit nannunik illoqarfiup eqqaaniittoqannginnera.
Taamatut tusagassiorfinnut nalunaarutikkut paasissutissiivoq WWF Verdensnaturfonden. Aningaasaateqarfiup illoqarfimmioq Anders Albirk atorfinitsissimava ullaat tamaasa illoqarfimmi eqqaanilu alapernaarsuisartussatut.
Verdensnaturfonden naapertorlugu ingerlatsivik taamaasiorpoq illoqarfimmiut toqqissisimaneroqqullugit, siusinnerusukkut oqartarsimammata nannut qaninngoortartut amerlasuut ullaakkut toqqissisimanartittarnagit.
Tamanna peqatigalugu alapernaarsuineq ingerlanneqartalerpoq nannut imminut illersorluni aallaaneqaqqunagit.
Ullut tamaasa
Aallaqqaamut alapernaarsuineq ullut tamaasa nalunaaqutaq 6 aamma 8 akornanni ingerlanneqartassaaq septembarip naanerata tungaanut. Ittoqqortoormiinilu piniarnermik nakkutilliisoq piffissami tassani alapernaarsuinermik aaqqissueqataasassaaq.
Nanoq qimaatippaa
Sapaatip akunnerani kingullermi sisamanngormat Anders Albirkip nanoq illoqarfimmut qanittuararsuarmiittoq qimaatissimavaa.
Tamannalu peqatigalugu Verdensnaturfonden arlalinnik suliniuteqarniarpoq innuttaasut nannullu aporaattarnerat millisarniarlugu. Tamanna ilaatigut pissaaq Kommuneqarfik Sermersooq suleqatigalugu.
Annertusillugu
Pilersaarutaavoq alapernaarsuineq aappaagu annertusineqassasoq, aammalu nannunik alapernaarsuisumut illoqarfimmilu allanut attuumassutilinnut atortussanik amerlanerusunik pisisoqassasoq.
Ittoqqortoormiini suliniut iluatsissappat isumaliutigineqarsinnaavoq Kalaallit Nunaanni inoqarfinnut allanut, nannut qaninngoorfigisartagaannut alapernaarsuinerup annertusineqarnissaa.
WWF Verdensnaturfonden taamatut suliniuteqareersimavoq Nunavummi, Alaskami Ruslandimilu.