London Mining-tilladelse

WWF-ip arferit isumakuluutigai

London Miningip atuinissamut akuersissutaa Nuup Kangerluani arfernut ajornartorsiortitsilersinnaavoq, WWF Verdensnaturfonden naliliivoq

Gitte Seeberg aamma Aqqaluk Lynge, WWF Verdensnaturfonden-ip ICC-llu suleqatigiilernerat 2012-imi Nuummi saqqummiunneqarmat

WWF Verdensnaturfonden-ip pinngortitaq uumassuseqarnerlu isumakuluutigai, aatsitassarsioqatigiiffiup London Miningip Nuup Kangerluani Isua-ni saviminissamik piiaanissamut akuersissummik tunineqarnerata kingorna.
– Nuup Kangerluani umiarsuit angallattorujussuanngussapput. Tamanna kangerllummi arfernut aalisarnermullu annertuumik ajornartorsiortitsilersinnaavoq. Sumiiffimmi taama attorneqarsimanngitsigisumi piiaaffimmik pilersitsineq aamma uumasunut allanut, assersuutigalugu tamaani tuttunut, ajornartorsiortitsilersinnaavoq.
– Neriuppugut isumaqatigiissummi nutaami pissutsit tamakkua eqqarsaatigineqarsimassasut, Gitte Seeberg, WWF Verdensnaturfonden-ip generalsekretæria Ritzau-mut oqarpoq.
Aalajangiinissaq sioqqullugu tusarniaanerit isornartorsiorneqartorujussuusimapput. Tamatumanilu Verdensnaturfonden aamma isornartorsiueqataasimavoq.
– Tamakkiisumik akuersaarparput Kalaallit Nunaanni ineriartortoqassasoq, aammattaarli isumaqarpugut pingaaruteqartoq tamassuma innuttaasunut iluaqutaanissaa, aammalu qulakkiissagipput piiaaffimmik pilersitsinikkut avatangiisit innarlerneqarpallaannginnissaat.
Verdensnaturfonden-ip ilaatigut aamma ernumagaa nukissaq suna atorlugu piiaaffik ingerlanneqassanersoq.
– Oqartariaqarpoq Kalaallit Nunaat silap pissusianut pissusilersorluartoq, pissutigalugu erngup nukinganik nukissap taama annertutigisup atornissaa pikkoriffigigamiuk.
– Piiaaffimmili maskiinanut angisuunut generatorinullu uulia atorneqassappat tamanna silap pissusianut annertuumik sunniuteqassaaq, Gitte Seeberg oqarpoq.
Namminersorlutik Oqartussat naatsorsuutigaat saviminissamik piiaaffiup sanaartorneqarnerani inuit 3.000-t sulisorineqassasut, naatsorsuutigineqarlunilu piiaaffiup ingerlanneqarnerani 750-it sulisorineqassasut.
London Mining siusinnerusukkut neriorsuisimavoq saviminissamik piiaaffimmik pilersitsinissamut akuerineqaruni ukiut 15-it ingerlaneranni Kalaallit Nunaata karsianut ukiumut 2 milliarder koruuninik isertitsisalersinnaalluni.
London Mining pillugu allaaserisat amerlanerusut atuakkit uani

Powered by Labrador CMS