peqquserlunnerit
Whistleblowereqalernissaa Transparencymit nuannaarutigineqarpoq
Innuttaasut sulisulluunniit kommunip aningaasaataanik peqquserluuteqartunik ilisimannittut aterminnik isertuussillutik nalunaarsinnaalernissaat Transparency Greenlandimit nuannaarutigineqarpoq
- Kommuneqarfik Sermersuup peqquserluttunik ilisimannittut aterminnik isertuussillutik nalunaarsinnaalernissaat Transparency International Greenlandimit (TIG) nuannaarutigaarput.
TIG-ip siulittaasua Anita Hoffer Kommuneqarfik Sermersuup pisortaaneranut Steffen Ulrich-Lyngemut aningaasaqarnermut innuttaasunillu sullissinermi kommunip pisortaanut Lars Møller-Sørensenimut ammasumik allagaqarpoq.
Kommuneqarfik Sermersuumi innuttaasut sulisulluunniit kommunip aningaasaataanik peqquserluuteqartunik ilisimannittut, siunissami sumiiffimmut ataatsimut nalunaarsinnaanngussapput.
- Tassunga tunngatillugu kommunip pilersaarutai tusarusuppagut. Isertortumik nalunaaruteqarsinnaaneq TIG-mit politikkerit eqqartorneqareerpoq, Inatsisartunilu aalajangiiffigisassatut isummerfigineqarnissaa aamma oqaluuserineqareerluni, Anita Hoffer Kommuneqarfik Sermersuumut ilaatigut allappoq.
Naalakkersuisut aallartisartut
Transparency International Greenlandip Kalaallit Nunaanni peqquserluttoqannginnissaa pillugu paasititsiniaasarpoq, inuiaqatigiinnut qanoq ajoqqusiisinnaanersoq ilaatigut nassuiaasoqartarluni. Taamaattumik isertortumik nalunaaruteqarsinnaaneq - tassa whitleblowerluni - peqatigiiffiup nuannaarutigaa.
Inatsisartut ukioq kingulleq novembarimi Naalakkersuisut misissueqquaat Kalaallit Nunaanni isertortumik nalunaaruteqarsinnaaneq suliffeqarfinni atuutilersinnaanersoq.
Kommuneqarfik Sermersuumi isertortumik nalunaaruteqarsinnaaneq 2015-mi aallartinneqarsinnaasoq naatsorsuutigineqarpoq.