Saturday, February 11, 2017 - 12:59

Washington Post: Uranisiorneq aqqutissaava?

Narsami uranisiornissamut akerliussutsimik takutitsisoqarnikuuvoq. Massakkulli Washington Postimi uranisiorfik allaaserineqarpoq.
Assi.: John Rasmussen/Narsaq Foto
"Kalaallit Nunaat aningaasanik pisariaqartitsivoq. Uranisiorneq aqqutissaava?" qulequtsiullug amerikamiut aviisiat nalunnginneqarluartoq Washington Post taama allaaserippoq.

Aviisip tusagassiortunga Narsamut tusagassioriartorluni angalanerani Narsarmi uranisiornissamut apeqqut najungaqartunit oqaaseqarfigineqarpoq. Allaaserineqartumilu atuarsinnaavat apeqqummut inuit isumaat assigiinngitsut.

Atuarfiup pisortaa Ivalo Motzfeldt aviisimut ima oqarpoq:

- Aningaasat pisariaqartippagut, kisianni aningaasat piinnarlugit nunarput aserussanngilarput.

GME-mi ingerlatsinermi pisortaq , Ib Laursen, piiaavimmi aqutsisussaq allatut isumaqarpoq:

- Periarfissatsialaavoq. Kalaallit Nunaat ineriartornissaminut iluaqutissamiknik pisariaqartitsivoq.

-  Dette er en gylden mulighed for at gøre det korrekt. Grønland behøver en god oplevelse, som gør det muligt at udvikle landet.

"Sjælen er på spil"

Kakiartuisartoq Paninnguag Lind Jensenip Kalaallit anersaavat ajortinneqassasoq.

- ”open-pit mine” googlerukku ajortuinnarmik takusassaqarputit. Soorlu tassa Kalaallit Nunaata Kujataata anersaava toqullugu, aviisimut taama oqarpoq.

Raajarniaq Jørgen Olesen isumaqarpoq siumut isigaluni piiaaneq imminut akilersinnaanngitsoq.

- Piiaavinni inuusuttut atorfinitsinneqartut piiaaneq naammassigaangat suliffissaaleqisunngortarput, Jørgen taama oqarpoq.

Savaatilik Klaus Frederiksen, 600-nik savaatillip ernummatingaa qinngornerup ulorianartup pujoralaanik pinngortitaq mingutsinnneqassammat. Piniartoq Sebu Kasperseni ernumanngilaq ima oqarami:

- Teknikkikkut atortut ullumikkut iluarnerupput. Uranimik piiaaveqalissagaluarpat ajorinngilara.

Vittus: - Suna tamarmi akeqarpoq

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsoq aviisip oqaloqatigisimavaa.

- Suna tamarmi akeqarpoq. Kiffaanngissuserput aamma. Inuiaqatigiit kiffaanngissuseqarusullutik piumassusaat apeqqutaavoq, Vittus Qujaukitsoq taama oqarpoq.

Washington Postip paasissutissiaraa tusagassiortup Michael Oneal tusagassiortut nuimanerit nunanit tamalaaneersut angalaqatigalugit ukiuni makkunani nunani isittuni allannguutit samminerussallugit. Qaaqqusanut ilaavoq kiffaanngissuseqartoq "Artic Times Project”.

Seneste nyheder / Nutaarsiassat kingulliit