Kujalleq
Wæverip isornartorsiuineq akerlilerpaa: Kommunimi pisortamut tatiginnittoq
IA-p isornartorsiuineranut borgmester Jørgen Wæver Johansen isumaqataanngilaq
Inuttaa pinnagu arsaq malersorsiuk!
Kommune Kujallermi borgmesterip, Jørgen Wæver Johansenip, taama oqaaseqarluni IA-p kommunalbestyrelsimi ilaasortaatitaasa kommunip pisortaanik Frank Hedegaard Jørgensenimik isornartorsiuinera akerlilerpaa.
Atuaruk: Kujallermi IA kommunimi pisortamut tatiginnikkunnaarpoq
Tatiginnikkunnaarneq
Partii illuatungiliuttoq kommunimi pisortamut tatiginnikkunnaarnerarput.
IA-p isummernertik ilaatigut inunnik isumaginnittoqarfimmi ajornartorsiutit arlallit - suliassarpassuit - kommunimi pisortap akisussaaffigigai tunngavilersuutigaat.
Atuaruk: Kommune Kujalleq isumaginninnerup tungaatigut ikiortissarsiorpoq
Saniatigullu kommunimi aalajangiinerit partiimi gruppip tusagassiuutitigut tusartarnerpaat.
Taperseraa
Illuanik borgmesterip naqissuserpaa, kommunimi pisortaq taperserlugu, erseqqissarpaalu isumaginninnermut tunngasuni sullissinermi ajornartorsiutit aaqqingajalersut.
– Naak massa suliassavut suli imaannaangikkaluartut, pingaartumik isumaginninnermut suliassat tungaatigut, isumaqarluinarpunga kommuni allaffissornerup tungaaatigut, aammalu sutigut tamatigut pitsaasumik nalimmassartoq, borgmesteri tusagassiuutinut nalunaarummi erseqqissaavoq.
– Kommunip allaffissornikkut suliassaanut sulisunik suliaminnut ilinniarluarsimasunik pissarsiniarnerput maanna kinguneqarlualeriartorpoq. Inunnik isumaginninnerup iluani sulisutta Isumaginninnermullu Ataatsimiititaliap akornanni, taamatuttaaq Namminersorlutik Oqartussat aallartitaannik aammalu Aarhus Kommunemi sulisunik attartukkatsinnik suleqatiginninneq ingerlalluarpoq.
Paasissutissanik pissarsisut
IA-p isumaginninnermut pisortap taamaatissimaneranik suliamut tunngasumi paasissutissinneqarsimannginnermik isornartorsiuinerat, aamma taassuma eqqunnginnerarpaa.
Taamatuttaaq tupigutsaqqallunga, IA eqqaasittariaqarpara, IA-p 29. januar 2016-mi apeqquteqaateqarnera aallaavigalugu 1. februar 2016-mi isumaginninnermut pisortaasimasoq pillugu nassuiaammik nassiussinikuugatta, nassuiaallu taanna IA-mit qujassutigineqarnikuummat, borgmesteri naqissusiivoq.