Wæver Johansenip nuussuinissaq illersorpaa: Nunarput aningaasanik sipaaruteqassaaq

Illoqarfinni minnerusunit borgmesterit ‘nuussuinissamut’ siunnersuutaasa saqqummiunneqarnerisa kingorna, sapaatip-akunnera qaangiuttorlu Sermitsiaq.AG-p borgmesterit ilaannik ataatsimik apersuinissaq iluatsippaa.

Kujalliup borgmesteria, Jørgen Wæver Johansen (S), kommuniminut pisariaqartitsisumut pisortani suliffinnik amerlanernik neriuuteqarnini taamaatinngilaa, naak Naalakkersuisut siunnersuut tallimanngormat itigartitsissutigigaluaraat.

Atuaruk: Nuussinissamik siunnersuut Naalakkersuisut itigartippaat

- Naalakkersuisummi siunnersuummik misissuilluaqqaarnissaminnut periarfissaqartinneqassapput. Annertuumik itigartitsinertut tigunngilara, Kujataani borgmesteri oqarpoq.

‘Suliffissaqalissaaq’
- Oqariartuutitut allatut oqaatiginninnerattut tamanna tiguara.

Suliffiit illoqarfinnut minnerusunut nuussorneqarnissaat allatut pissasoq, borgmesterit taakku pingasut Naalakkersuisunit ilisimatinneqartut Wæverip oqaatigaa.

Atuaruk: Siumup nuutsitsinissamik siunnersuut taperserpaa

- Aaqqissuussaanermut Isumalioqatigiissitammi 2000-ikkunni innersuussutigaat, akisussaaffippassuit suliffiillu Namminersorlutik Oqartussanit kommuninut nuunneqassasut. Maannamut suliffeqarfiit tallimaannaat kommuninut nuunneqarnikuupput, Naalakkersuisullu maanna oqarfigaatigut tamanna sukkanerusumik ingerlanneqassasoq, borgmesteri nassuiaavoq, nassuerutigaali tamanna kommuninit pingasunit siunnersuummit kigaannerusumik tamanna immaqa piumaartoq.

Isumaat allanngussasoq
Taassuma oqaloqatigiittoqarnerunissaa neriuutigaa, ilimagaalu borgmesterit atorfippassuit nuunneqarnissaannut siunnersuutaannut Naalakkersuisut qaninnerulerumaartut.

Sooq taamatut isumaqarpit?

Piviusut. Naalakkersuisut kisitsisit siunnersuutitsinniittut misissorluarnissaannut periarfissinneqariarpata paasilluarnerulissavaatigut. Kalaallit Nunaanni ullutsinni piviusut tamanna pisariaqarluinnartippaat.

- Nunatsinni isertitat tamakkiisut kisiisa isiginiarunikkit, kommuni ataasiinnaq aningaasarsiat agguaqatigiisinneranni kisimi qaangerlugu inissisimassaaq, tassalu Sermersooq, Wæver Johansen oqarpoq.

Rom ullormi ataatsimi sanaartorneqanngilaq
- Kisianni oqartoqanngilaq, suna tamarmi ullormiit ullormut piumaartoq. Romimi ullormi ataatsimi sanaartorneqanngilaq.

Siunnersuutigisassi tiguneqarnera qanoq igaajuk?

- Tiguneqarnera ilimagisatut ippoq. Tusagassiorfiit akerliusunik nassaarnissamik pikkorittut assut malunnartoq isumaqarpunga. Kisianni taamatut oqallitsitsinera nuannarilluinnarpara.

- Kammatsitsingaatsiarpoq, ilaatigullu oqallinneq illikartinneqarnissaa pisariaqartarpoq.

Illit partiinnit Inuit Ataqatigiinnilu ilaasortamit allamit aamma Partii Naleqqamik tapersiisoqaraluarpoq…

- Sinerissami tapersiisoqangaatsiarpoq. Politikkikkut tunuliaqquttat apeqqutaatinnagit tapersiisunik taamaallaat naapitsivunga. Aqqaluaq B. Egedemillu taperserneqarnera nuannaarutigaara, aamma amerlasuut uagutsitut isumaqarnerat Sermitsiaq.AG-mi taasisitsinerup inernerata takutikkaa isumaqarpunga.

Nanortalimmik assersuut
Siunnersuutip ilaani kukkulluinnartoqartoq, assersuutigalugu ombudsmandip allaffeqarfia Nanortalimmut nuunneqarnissaa, Naaja Nathanielsen (IA) illuatungiliuttuneersoq isumaqarpoq. Inatsilerituut aqqanillit illoqarfiit minnerit ilaannut pilerisaarnissaat ajornarsinnaasoq, taanna ilumoortortaqarsinnaanngila?

- Naamik, taamatut isumaqanngilanga. Taassuma akissutaata nunarsuarmik isiginnittariaasaanik ersersitsilluartoq isumaqarpunga; Tassa piffiit ilaat ajorneruleriartussasut. Illoqarfiit tamakku matujartorneqarnissaannik imaluunniit ilinniarsimanngitsunik suliffeqarfiussanerannik unneqqarilluni oqaatigissagaa.

Siunnersuummik takorusuttoq
Jørgen Wæver Johansenip atorfiit 600-t illoqarfinnut minnerusunut nuunneqarnissaannik siunnersuummut isornartorsiuisut, allanik siunnersuuteqarnissaat kajumissaarpai.

- Oqaloqatigiinneq taama ingerlasarpoq.

Nanortalik assersuutitut tigugaanni, illit nammineq kommunit ilinniarluarsimasunik illoqarfimmut sulisussarsiornermi qanoq iliuuseqarpa?

- Sinerissami piviusut aallaavigalugit tamanna isigissagit isumaqarpunga. Kommunitta ilaat aningaasarliorsimapput, 2015-imilu aatsaat aningaasaqarnikkut oqimaaqatigiittoqarneruleqqippoq, tamannalu piareersaanernik aamma iluarsaassinernik ingerlatsisimanitsinnik isumaqarpoq, taamaattumillu ineriartortitsinissamik kommunimi eqqarsartoqarpallaarsimanngilaq.

Aningaasanik sipaarniartut
Ilinniarluarsimasut atorfiinik Nanortalimmut nuussinissamut kommunissinni aningaasatigut ajornartorsiorneq periarfissaatinngikkaa taakkartorpat. Nunatsinni aningaasanut inatsimmi tamakkununnga ineriartortitsinissamik sinneqartoortoqartoq isumaqarpit?

- Maanna assersuusiorputit (Nanortalik red.), siunnersuullu ataatsimut isigissagit qinnuigissavakkit. Nunap aningaasaqarneranut atatillugu, taamatut nuussuineq piffissap ingerlanerani annertoorujussuarmik sipaarutinngorsinnaasoq isumaqarluinnarpunga. Namminersorlutik Oqartussani maanna atorfillik agguaqatigiisillugu qaammatit 13-14 atorfeqartarput, illoqarfinnullu allanut nuussuineq aalaakkaasunik sulisoqarnermik pilersitsissaaq.

Sooq taamaattoqassava?

- Illoqarfinni minnerusuni, soorlu maani, atorfeqarsimanerup sivisussusianik sivisunerusumik pilersitsisinnaanerugatta - sulisullu tigumminerusaratsigit. Tamanna uanga misilittagaqarfigaara. Kommune Kujalleq tamakkerlugu ukiuni arfineq-pingasuni innuttaasunik tunngavitta 10 procentii annaanikuuagut, tamannalu ajornartorsiut allanngortinniarsaraarput, Jørgen Wæver Johansen naggasiivoq.

Atuaruk: Nuussinissamik siunnersuut Naalakkersuisut itigartippaat

Atuaruk: Siunnersuut: Nuummi suliffiit 600-t ukununnga nuussapput