Angallanneq
Wæver Air Greenlandimut: Kusanaatsuliorneq
Kujataata borgmesteriata Jørgen Wæver Johansenip Air Greenland isornartorsiorpaa, namminersorlutik oqartussanik angallannermi sullissinissamik isumaqatigiissutinik nutaanik isumaqatigiinniuneqarnermini sulisuminik ´sallunaveeqqutitut´ tigusinerarlugu
– Allaanngilaq Air Greenlandip nammineq sulisorisani sallunaveeqqutitut isumaqatiginninniarnerni atorusukkaat - tamanna inunnut suliffimminnut ilumoorlutik ukiorpassuarni sulisimasunut kusanaatsuliornertut annertuutut isumaqarfigineqanngitsoorsinnaanngilaq. Eqqarsarnaq pisortat nammineq piginneqataaffigisaat taamak sulisuminut pissusilersortoq.
Kommune Kujalliup borgmesteria Siumumeersoq Jørgen Wæver Johansen Facebookimi quppernermini taamatut allappoq.
Taamatut qisuariarneranut pissutaavoq Air Greenlandip tallimanngornermi aggustip 29-anni sulisuminit 648-nit 30-t soraarsimmagit, pissutigalugu naatsorsuutigineqarmat 2015-imi januaarip aallaqqaataanit Kujataani angallannerup aaqqissuussaanera annertuumik allanngortinneqassasoq.
Wæverip Naalakkersuisut tamakkiisumik tatigai
Nunatta timmisartortitseqatigiiffiata sulisuni 30-t soraarsippai, namminersorlutik oqartussat maanna isumaqatigiinniarnernut ingerlanneqartunut atatillugu siunniummassuk maanna Kujataani helikopterimik angallassisarneq angallatinik helikopterinillu akuleriissillugit taarserneqassasoq. Periuserli tamanna Jørgen Wæver Johansenip nuannarinngilaa.
– Paasisinnaalluarpara ernumasoqarmat - paasitinneqarnerpugulli isumaqatigiinniarnerit suli ingerlanneqartut - imaappoq suli qanoq aaqqiisoqassanersoq aalajangerneqanngilaq aamma ilisimanngilarput.
– Uanga neriuutigilluinnarpara pitsaasumik aaqqiissuteqartoqassasoq - qanormi allatut - aamma naatsorsuutigaara tamannarpiaq siunertaralugu naalakkersuisuutitagut sulillutik ilungersortut, kujataata borgmesteria allappoq.
Air Greenland neqerooruteqarsinnaanngilaq
Allaaserisami septembarip aallaqqaataani ilanngunneqartumi ´Air Greenlandip sulisut 30-t soraarsippai´, Sermitsiaq.AG-mit apersorneqarluni Air Greenlandip aningaasarsiornermut pisortaa Christian Keldsen oqarpoq:
– Pissutsit nuanninngeqaat. Maannangaarli aaqqissuussinerput ullumikkuminngarnit annikinnerungaatsiartumik suliaqalernissatsinnut naleqqussartariaqarparput, aningaasartuutit amerlinissaat pinngitsoorniarlugu.
Arfininngormat Christian Keldsenip tikkuarpaa Air Greenland angallatinik timmisartunillu akuleriisillugit aaqqiissummut neqerooruteqarnissaminut periarfissaqarsimanngitsoq.
– Isumaqatigiinninarnerup nalaani timmisartuinnavinnik aaqqiissuteqarnissamik periusissanik saqqummiussisoqanngilaq, taamaattumik pissusissamisuuginnarpoq Air Greenland selskabitut akisussaasutut pisariaqartumik iliuuseqarmat, aamma sulisuminut, ajoraluartumik pissutsinit eqqorneqartunut, Air Greenlandip aningaasarsiornermi pisortaa nassuiaavoq.