VM-imut anngutereernermi kingorna: Taama sukataartigeqqissanngilanga

Jens Bjerge Københavnimi Ironmanimik unammisitsisoqarnerani Københavnimi sapaatiummat peqataavoq.

Ukiuni kingullerni angusarinnerpaaffigisani anguniarlugu peqataavoq, unammeqataalluarporlu. Tassami rekordini minutsini qulingiluangajanni anguaa.

Ironmaneqataagami akunnerit qulingiluat, minutsit 53-it kiisalu sekundit 23-t atorpai.

Jens Bjerge Nukissiorfinni sulisuuvoq Nuup eqqaani sulisarluni.

Sikkilernermini orlusoq
Ironmanimik unammisitsineq Jens Bjergemut nalunaaqutaq 08.00 aallartippoq. Siullermik 3,8 kilometerinik naluppoq. Unamminerup aallartinnera pissangaffiusoq oqarpoq.

- Peqataasussat assut pissangarrapput. Inuppassuit peqataammata nalunnermi unammineq assut ajornarpoq, tassami aamma ajattaattoqarpoq, siuariarnissamut assut ajornakusoorluni. Nalunnertaani suli sukkanerusimasinnaagaluarpunga, Jens Bjerge Sermitsiaq.AG-mut oqarpoq.

Naloreernermi kingorna 180 kilometerini sikkilerpoq.

- Peqataasorpassuit tassani qaangerpakka. Assut sukataarpunga killissaa tikeqqaannavillugu. 80 kilometerini sikkilereerluta imermik tigusiniarluta sukkavallaarama unammeqataasoq eqqortoorakku orluvunga. Kimillanneqalaarpunga, kisianni qujanaqaaq sikkili ajoqqusersimanngimmat, Jens Bjerge oqarpoq.

Sikkilernermini akunnerit tallimat minutsillu 16-it atorpai.

Qasusorujussuanngoraluartoq
Sikkilereernermi kingorna maratonerpoq.

- Maratonimi arpakkama aamma killissaa tikillugu arpappunga. Kisianni apuunnissannut kilometerit qulingiluaannanngortut qasusorujussuanngorpunga, allaat pisunnissara eqqarsaatigileraluarlugu. Isiginnaartuniilli ernera suaariasaarpoq sisamaattut inissisimasoq minutsini pingasuni 30 sekundinilu uannit ungasinnerusoq. Ernerma suaareermanga assut nukissaneriataarpunga paasisinnaanngisannik, apuunnissammalu tungaanut ajunngivissumik arpallunga, Jens Bjerge oqarpoq.

- Apuukkama nuannaaqaanga, tassami anguniagara anguara. Soorunami aamma killitsisimaarnarpoq taamatut angusaqarluni, rekordigalu minutsini qulingiluangajanni angugakku nuannareqaara, oqarpoq.

Sisamaattut inissisimasoq anguaa, sekundini tallimani apuutiaarnerulluni. Taamaasilluni aamma Hawaiimi VM-eqataanissaminut annguppoq.

- Rekordera anguniarlugu peqataavunga. VM-imut anngunnissara angunianngikkaluarpara naatsorsuutigisimanagulu. Misigisaqarluarniarlunga VM-eqataajumaarpunga, Jens Bjerge oqarpoq.

Nutaanik anguniagaqalerniartoq
Jens Bjerge oqarpoq taama sukataartigeqqinnaviarnani.

- Ironmaneqataanissannut sungiusarnera piffissamik tigusisorujussuuvoq. Maratonerama akunnerup aappaa avillugu amigaataasoq aatsaat taama naalliutsigaanga. Taamaattumik sungiusarujussuaqqinnissamut naammatsippunga. Aappaagu peqataaqqissaanga, kisianni taama sungiusartigeqqissanngilanga. Angusarisara aamma naammagisimaaqaara, Jens Bjerge oqarpoq. Taassuma neriuutigaa inuusuttut triatlonimi ironmanimiluunnit peqataasalerumaartut.