VM-imut anngunniunneq
VM-imut anngunniunnermi nunat Kalaallit Nunaata unammissavai
Cubami Panamerikami pissartanngorniunnissamut makitsisoqaqqammerpoq. Ajugaasut Danmarkimi nunarsuatsinni pissartanngorniuteqataassapput
Brasilia, Paraguay, Venezuela, USA aamma Puerto Rico.
Panamerikami pissartanngorniunnermi Kalaallit Nunaata assammik arsartartuisa nunanut allanut unammisartuisa arnartaasa nunat taakku unammissavaat.
Nunarsuatsinni pissartaasut Brasilia ilaatigut unammisussanngorpaat.
Panarmerikami pissartanngorniunnermi nunat aqqaneq marluk peqataapput, unammersuaarnermi nunat taama amerlatigisut aatsaat peqataapput.
Brasilia VM-imut anngutereerpoq, angusarissaarnerpaallu pingasut aamma toqqaannartumik anngutissapput.
Aningaasaqarnikkut ajornartorsiorsinnaaneq
Unammersuaarnermi sisamaattut inissittoq aamma suli nunarsuatsinni pissartanngorniunnissamut periarfissaqassaaq. Tassani Algeria, Australia aamma Kazakhstan unammineqassapput, Assammik Arsartartut Kattuffiat nalunaaruteqarpoq.
Kalaallit Nunaat tassunga unammeqataassaguni nalunarpoq suli peqataasinnaassanersoq, tassami aningaasaqarneq aporfiusinnaavoq:
- Kalaallit Nunaat taamaammat tassunga anngunniunnermut aaqqissuisuusinnaanerluni qinnuteqarpoq. Kisianni nunat tamalaat assammik arsartartut kattuffissuat IHF oqaloqatigineqaqqaassaaq. Cubami unammisoqareerpat tamanna aalajangerneqarumaarpoq kalaallit sisamaattut inississimassappata.
Panamerikami pissartanngorniunneq maajip 21-anit 28-t ilanngullugu ingerlanneqassaaq.
Gruppe B-mi unammissapput: Argentina, Uruguay, Mexico, Cuba, Guatemala aamma Chile.
Nunarsuarmi assammik pissartanngorniunneq Danmarkimi decembarimi ingerlanneqassaaq.
Panamerikami pissartanngorniunnissamut makitsineq qanoq neriunaateqarnersoq nunanut allanut unammisartunut sungiusaasoq Jakob Andreassen Sermitsiaq.AG-mit apersorneqassaaq.