Skip to main content

Vivian Brexit pillugu ataatsimeeqateqariartulersoq

Tuluit EU-mit anippata - Brexit-imik taagorneqartumi - Nunarput aningaasanik millionilippassuarnik annaasaqarsinnaavoq. Nunanut allanut naalakkersuisoq, Vivian Motzfeldt, Bruxelles-imut arlalinnik ataatsimeeqateqariartorluni sapaatip akunnerata tulliani angalassaaq.

Namminersorlutik Oqartussat Bruxelles-imi Brexit pillugu EU-p Tuluit Nunaatalu isumaqatigiinniarnerini imaannaanngitsuni Nunarput eqqartugassanut ilanngutsinniarlugu isumasioqatigiisitsilerput. Tamatuma saniatigut Vivian Motzfeldtip Brexit pillugu EU isumaqatigiinniartuisa pisortaat, Michel Barnier, ataatsimeeqatigissavaa.

Isumasioqatigiinnissamut 43-t nalunaartut

Tuluit Naalakkersuisuinut isumaqatigiinniarnerit annertuumik kinguneqartarsimapput, ilaatigut ulluni kingullerni ministerit arlallit taarserneqarneranik kinguneqartarsimalluni. Kingullertullu nunanut allanut ministeri tunuarpoq.

Namminersorlutik Oqartussat Bruxelles-imi isumasioqatigiinnermik juunip 19-ani aaqqissuissapput. Isumasioqatigiinnermi peqataaniarlutik nalunaarsimapput 43-it. Taakkua ilaatigut  atorfilittaapput, soqutigisaqaqatigiinnersut, politikerit aamma tusagassiortut. Peqataaniarlutik nalunaaruteqartut aaqqissuisunit nuannaarutigineqarnavianngitsuunngillat, tassami EU-mi atorfilittat politikerillu nalinginnaasumik juulimi aggustimilu aasaanerani sulinngiffeqartarmata.

Isumasioqatigiinnermi nalunaaquttap akuneranik sivisussuseqatussami Vivian Motzfeldt naalakkersuisoqarfianilu pisortaq Kenneth Høegh ilaatigut Nunatsinni pissutsit pillugit saqqummiussaqassapput. Aamma oqallinnissamut apeqquteqarnissamullu periarfissaqassaaq. Isumasioqatigiinnerlu aamma nalunaaquttap akunneranik sivisussuseqartumik ilassinninnernik, tamussiussassaqarfiulaartumi, naggaserneqassalluni.

Vivian Motzfeldt ICC-ip Barrow-imi ataatsimeersuarneranit toqqaannarluni juulip 17-ani Bruxelles-imukaassaq.

Isumasioqatigiinnerullu saniatigut aamma inunnik pingaarutilinnik ukunannga ataatsimeeqateqassalluni:

  • Nunat tamalaat pillugit aamma ineriartortinneqarnerat pillugu europa-kommissær Neven Mimica 
  • Avatangiisit, imaani angallannermut tunngasut aamma aalisarneq pillugu (arferit, puisit Issittorlu ilanngullugit) europa-kommissær Karmenu Vella
  • Brexit pillugu isumaqatigiinniartartut pisortaat Michel Barnier
  • Vice-generalsekretær Christian Leffler, EU-ip ataatsimoorussamik nunanut allanut tunngasunut sullissivianeersoq (Issittoq pillugu atorfilittat qullersaat)
  • Danmarkip NATO-ambassadøria Michael Zilmer-Johns
  • Danmarkip EU COREPER II Ambassadøria Kim Jørgensen
  • EU-p Politikkukkut sillimaniarnermi ambassadøria Lars Bo Larsen
  • Taakkualu saniatigut aamma EU-mi ilaasortat sinniisaat allat.

Nunatsinnit Vivian Motzfeldtip saniatigut naalakkersuisoqarfiani pisortaq Kenneth Høegh atorfilittarlu alla ataaseq peqataassapput.

Tuluit Nunaannut tikeraarnissaq

Nunanut allanut naalakkersuisoqarfimmit Sermitsiaq.AG-mut ilisimatitsissutigineqarpoq isumasioqatigiinnissami uani Tuluit Nunaannersunik toqqaannartumik ataatsimeeqateqartoqassanngitsoq.

- Kalaallit Nunaat pingaarnertut siullertullu EU-mik isumaqatigiissuteqarpoq. EU-lu aqqutigalugu Tuluit Nunaannut niuerneq ingerlanneqartarpoq. Tuluit Nunaannut tikeraarnissaq kingusinnerusukkut pilersaarusiorneqarumaarpoq, Nunanut Allanut Naalakkersuisoqarfik Sermitsiaq.AG-mut mailikkut taama ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER