assit takukkit
Vivi Sørensen isiginnaartitsisartunngorpoq
Vivi Sørensenip isiginnaartitsinermut ilinniarfimmi Odensemi ilinniartoqatini peqatigalugit inaarutaasumik isiginnaagassiaq takutissavaat
Sapaatip-akunnera pisoqarfiusussaq Vivi Sørensenimut Nuummeersumut utaqqivoq.
Den Danske Scenekunstskolenimi Odensemiittumit marlunngorpamit inaarutaasumik isiginnaagassiaq, Tartuffe, Københavnimi Det Kongelige Teaterimi takutissavaat.
Arfininngorpallu ilinniakkaminik inissaaq.
- Atuaqatigiit arfineq pingasuuvugut, 2013-imi atuarfitsinnut iserusuttut 1000-it missaanniittut akornanni ingerlaqqeqattaarnermi toqqagaanikuulluta, taanna allappoq.
Unammillernartut arlallit
2013-imiilli ilinniarluni Odensemi najugaqarpoq.
- Ukiuni sisamani isiginnaartitsisartunngorniarnera artornarnikooqaaq; ilaquttakka qimallugit ikinngutikka nunatsinniittut maqaasingaarlugit inuiaqatigiittullu inooriaaserput sungiussimasara qimallugu angerlarsingaarlungalu pinikuugama. Massakkulli tassa ilinniarnera inilerpara ilikkakkanillu ulikkaarpunga; inuttut ineriartorsimaqalunga isiginnaagassiornernilu sakkussanik ulikkaarlunga.
Canadamut nuulersoq
Vivi Sørensen Canadamut nuussaaq, tassanilu ilinniaqqissaaq.
- Ilinniarnerma ingerlanerani paasilerpara aamma isiginnaagassianik ilitsersuisartunngorusullunga, taamaammat nuannaarutigalugu oqaatigisinnaavara Canadami ilinniaqqinnissannut akuerisaasimanera: University of Ottawami ilitsersuisutut masterimik ilinnialerpunga ukiunik marlunnik sivisussuseqartumik. Ilinniarneq tassani tuluttut franskisullu ingerlanneqassaaq, Vivi Sørensen oqarpoq.
Uani ataani assit takukkit