Vittus: Ullumi ulloq oqaluttuarisaanermi pingaaruteqarpoq

Aningaasaqarnermut Naalakkersuisoq, Vittus Qujaukitsoq (NQ), mittarfiit pillugit isumaqatigiissutit inatsisartuni oqaluuserineqalernerani naggataasumik oqallinneq ammaramiuk qularinngilaa amerlanerussuteqartut akuerissasut.

Oqallinnermi isummat assigiinngitsut saqqummiunneqarnissaat naatsorsuutaagaluartoq, taamaattoq tunngavissasut siunnersuummi saqqummiuppai.

- Ullumi ulloq oqaluttuarisaanermi pingaaruteqarpoq. Kalaallit Nunaata oqaluttuarisaanerani attaveqaqatigiinnermi aningaasaliinerit annertunersaat isummerfigissavarput, oqalugiarnini aallarnerpaa.

- Siunnersuutip matuma akuerineqarnerani, maannakkut attaveqaqatigiinnermut sanilliullugu angalasut amerlanersaannut annertuumik pitsanngoriartoqassaaq. Innuttaasut illoqarfinni allani ilaquttaminnut tikeraartussat, nunatta iluani aammalu nunani allani sulillutik angalasut, minnerunngitsumillu takornariat maannakkut siunissamilu nunatsinni isorartoorsuarmut tikeraartartussat tassani pineqarput.

Mittarfiit pillugit isumaqatigiissutip nunatsinnut iluaqutissartai pingasut erseqqissarpai.

Angalasut amerlanerpaartaat Nuummut Ilulissanullu angalasuupput. Nuummi Ilulissanilu mittarfiit 2.200-isut takitigilersinnerani angalasut toqqaannartumik tikiffissaminnut toqqaannartumik angalasalernissaat anguneqarsinnaapput. Piffissaq aningaasallu taamaaliornikkut sipaarneqarsinnaapput.

Kujataanut angalasut affaat Qaqortumut angalasarput. Qaqortumi mittarfimmik 1.500 miiterisut takitisumik sanasoqarnerani, allamut unikkallaqqaarnatik apuuttarnissaat piffissamik aningaasartuutinillu sipaarfiussaaq.

Mittarfiit pingasut taakku nutaat angallannermik nutaamik illoqarfinni pineqartuni pilersitsissaaq. Timmisartut anginerit atorlugit angalasut amerlanerit angallannissaat periarfissaalissaaq, angallannermut bilitsinut akikinnernik kinguneqarsinnaavoq, takornarialerinermilu inuussutissarsiornermilu nutaanik periarfissiissalluni.

- Siunnersuut aamma allatut oqaluttuarisaanermi pingaaruteqarpoq. Mittarfiit pioreersut tallilerneqarnissaat aammalu nutaanik mittarfiliornissaq ukiuni qulikkaani oqallisigineqarpoq. Siunnersuutip matuma akuerineqarnerani oqallinnermi tassani kapitali pingaaruteqartoq naammassineqartussaavoq, taamaalillunilu attaveqaqatigiinnermi, inuussutissarsiornermi takornariartitsisarnermilu nutaamik aningaasaliinissamut tunngavissat pitsaasut pilersinneqartussaallutik, Vittus Qujaukitsoq (NQ) nangippoq.