Arktis

Vittusip USA suleqatigerusukkaa

Vittus Qujaukitsoq Amerikap avannaani issittumi sanilitsinnik nunarsuup immikkoortuani suleqateqarneq patajaallisarniarlugu ataasinngormat Washington D.C.-miippoq

Vittus Qujaukitsoq
Vittus Qujaukitsup ataasinngormat Amerikap avannaani aallartitat naapippai.

Inuussutissarsiornermut, Suliffeqarnermut, Niuernermut, Nukissiutinut Nunanullu Allanut tunngasunut Naalakkersuisoq ataasinngornermi ulloq 27. Marts Washington D.C.-mi ataatsimut unammilligassat periarfissallu – tassunga ilanngullugit ingammik aningaassarsiornikkut ineriartornissamik periarfissat kiisalu attaveqaatinik aningaasaliinernillu periusissianik pisariaqartitsinerit oqaloqatigiissutiginiarlugit Alaskamit, Nunavumit, Yukonimit Northwest Territoriesimeersunillu sinniisunik ataatsimeeqateqarpoq, naalakkersuisoqarfik tusagassiuutinut paasissutissiivoq.

Eqqarsaqatigiinneq

Eqqarsaqatigiinneq The Woodrow Wilson Centerimit aaqqissorneqartumi American Arctic Regional Leaders’ Summitimi peqataavoq. Ullaap tungaani Alaskamit, Nunavumit, Yukonimit, Northwest Territoriesimit Kalaallillu Nunaannit naalakkersuisut sinniisui suliffissuarnillu sinniisut ataatsimut soqutigisat, unammillernartitat suleqatiginnissamullu periarfissat oqaloqatigiissutigineqarput – tassunga ilanngullugit Issittumi aningaasaqarnikkut ineriartorneq, attaveqaatit nalunaarasuarnikkut attaveqaatinik pisariaqartitat kiisalu aningaasaleerusussutsimik pilerilersitsinissamik periarfissat.

Ualikkut ataatsimiinneq ”The North American Arctic: Building a Vision for Regional Collaboration”, tamanut ammasoq 120-it missaannit peqataaffigineqarpoq. Amerikap avataani issittormiut naalakkersuisuisa oqalliseqatigiissinneqarneranni Vittus Qujaukitsup Naalakkersuisut anguniagaat Kalaallillu Nunaata ineriartornissaanut takorluugaat kiisalu nunarsuup immikkoortua akimorlugu suleqatigiinnissamik periarfissat saqqummiuppai.

- Issittumi nunarsuup immikkoortua akimorlugu ineriartornermik suleqatigiinnerunermillu pilersitsinissaq Kalaallit Nunaata kissaatigaa. Matumanilu Amerikap avannaani nunanik sanilitsinnik suleqateqarnerup patajaallisarneqarnissaa Kalaallit Nunaannut annertuumik pingaaruteqarpoq. Alaskami, Yukonimi, Northwest Territoriesimi Nunavumilu sanilitsinnut pissusissamisoortumik kulturikkut ataqatigiiffeqarpugut, peqatigisaanillu unammillernartunut annertuunut periarfissanullu assigiissumik inissisimavugut, taamaanneratalu pissusissamisoortumik suleqatigiissippaatigut. Ataatsimiinnermi avannaarsuarmioqatigiittugut attaveqarnitsinnik patajaallisaanissamik periarfissippaatigut, suleqatigiiffigisinnaasatsinnillu, soorlu attaveqaatinut, ilisimasanik avitseqatigiinnermut, aningaasaliinernut, niuernermut, assartuinermut, takornariartitsinermut il.il. tunngasunik oqaloqatigiinnissatsinnut periarfissilluta. Ilaatigut periarfissaq iluatsillu ataatsimiinnitsinni pissutsit Kalaallit Nunaannut unammillernartut kiisalu siunissami suleqatigiinnissamut kissaativut ataatsimiinnermi erseqqissaatigaakka, Vittus Qujaukitsoq paasissutissiivoq.

Amerikami naalakkersuisunngortut

Ataatsimeersuarnermi ” The North American Arctic: Building a Vision for Regional Collaboration” saqqummiussinera, Amerikami naalakkersuisunngortunut aningaasatigut ineriartornermut eqqarsaatitsinnik kiisalu tamanna pillugu USA-mik suleqateqarnissamik kissaatitsinnik ilisimatitsinissamut periarfissiivoq.

The Woodrow Wilson Center eqqarsaqatigiiffinnut tutsuigineqarnerpaanut ilaavoq, taakkulu ”The Polar Initiative” Issittumi sammisanik tamanut kiisalu Washington D.C.-mi politikikkut attuumasunut siaruarterineq sammisaraat. Siunissami Kalaallit Nunaannik samminnittumik aaqqissuussinissaq eqqarsaataavoq.

Powered by Labrador CMS