Vittus: - Atsiornerit piareerumaarpagut

Vittus Qujaukitsoq eqqissisimaqaluni oqalunnerani qularnermik tusarsaasoqanngilaq.

- Qineqqusaarnissamut piariissaagut. Qineqqusaarnissaq qilanaarutigaara, Siumumi politikkeriusimasoq erseqqissaavoq.

Ippassaq KNR-p allappoq, Partii Nunatta Qitornai atsiornernik katerseqqittariaqartoq, tamatumunnga pissutaavoq atsiornerit 200-ut taamaatinneqarsimaneri. Qinersineq 17. april pissappat, Vittus Qujaukitsoq atsiornernik katersinissamut sapaatip akunneranik periarfissaqarpoq. Tamannalu ernumassutiginngilaa.

- Namminiilivinnissamut aqqut qanoq isikkoqarnissaa qineqqusaarutigissavarput, taanna Sermitsiaq.AG-mut oqarpoq.

Namminiilivinnissamut aqqut qanoq isikkoqarsinnaanera pillugu partii qineqqusaaruteqassasoq, taassuma oqaluttuaraa.

Vittus Qujaukitsulli tupaallaatissaanngitsumik pingaartitaasa ilaat aamma pingaaruteqassaaq.

- Soorunami Danmarkimut USA-mulli attaveqarnerput eqqartussavarput, taanna oqarpoq.

Partiillu inuussutissarsiornikkut politikkimik ilaatigut saqqummiussaqanissaa, erseqqissaatigaa. Tassa innuttaasut inatsisitigut illersugaanerinik aningaasaqarnermullu tunngasunik.

- Naak sapaatit akunnerini arfiniliinnarni qineqqusaartoqartussaangaluartoq, innuttaasunut qanoq saqqummiussassaqarnerluta nassuiaatigiumaarparput, taanna oqarpoq.

Partiilu sinnerlugu kikkut allat sassarumaarnersut, Vittus Qujaukitsup suli oqaatigiumanngilaa.