uuliap akia
Vittus tunuarterpoq
Polaroilip uuliap benzinallu akianik maannakkorpiaq annertunerusumik appartitsinissaanik piumasaqaanni Naalakkersuisunut ilaasortap Vittus Qujaukitsup taamaatiinnarpaa
Marlunngormat ullaap tungaani aningaasaqarnermut naalakkersuisup Vittus Qujaukitsup tupaallaatigalugulu pakatsissutigaa Polaroilip uuliap benzinallu il.il. akiat liiterimut taamaallaat 27 øremik appartinniarmagu, uuliap akia nunani tamalaani tuniniaavinni piffissami sivisunerusumi appariangaatsiareersimagaluartoq.
Tamtauma saniatigut isumaqarpoq akit Naalakkersuisunut aalajangiivigisassatut saqqummiunneqarsimasariaqaraluartut. Naalakkersuisunullu ilaasortap toqqaannartumik piumasaraa Polaroilip akit tunuartissagai.
Tusaatissatut tiguvaa
Pingasunngormat ualikkut isummani mumitippaa.
Tusagassiorfinnut nalunaarutikkut Naalakkersuisunut ilaasortap akit 27 øremik appariarnerat, januaarip 5-anni atuutilersoq, tusaatissatut tiguvaa.
– Naalakkersuisut tusaatissatut tiguvaat ikummatissat akiisa appartinneqarnerat, taamaasillunilu Polaroilip 2014-imi upernaakkumiilli akiat liiterimut katillugit 72 øremik appartissimagai, Namminersorlutik Oqartussat tusagassiorfinnut nalunaarutikkut paasissutissiipput.
Kiffartuussinissamik isumaqatigiissut
Tamatuma saniatigut tusagassiorfinnut nalunaarummi allassimavoq Polaroilip akit appartissimagai Namminersorlutik Oqartussanik kiffartuussinissamik isumaqatigiissut, ukioq manna kingusinnerusukkut naasussaq, naapertorlugu. Ilanngullugu Namminersorlutik Oqartussat akit liiterimut 27 øremik apparnerannut tunuliaqutaasoq paasissutissiissutigaat.
Kinguaattoornerit
Illua'tungaatigut akit sapinngisamik appasinnerpaajussapput, aappaatigulli Polaroil kiffartuussinissamik isumaqatigiissutip maanna atuuttup atuunnerani sapinngisamik annertunerpaamik sinneqartooruteqassaaq, taamaasilluni KNI-p selskabiata Polaroilip tankeqarfiini aserfafllatsaaliinissamik kinguaattoornerit iliuuseqarfigissammagit.
Nutaamik isumaqatigiinniarnissaq
Tamanna peqatigalugu Naalakkersuisut erseqqissarpaat piffissami qaangiuttumi nunarsuarmi uuliap akia liiterimut 72 øremik annertunerujussuarmik appariarsimasoq.
Taamaattumik Naalakkersuisut KNI/Polaroilimik kiffartuussinissamik isumaqatigiissut pillugu isumaqatigiinniuteqarnissaminni samminiarpaat ikummatissanut imerpalasunut atuisartunut akit apparteqqinneqarsinnaanersut.