Siumumi ataatsimiinneq
Vittus: Siulittaasunngorniunnermi ajugaaguma qinersisoqassaaq
Vittus Qujaukitsup Siumumi siulittaasuuffik Kim Kielsenimit tigussagaluaruniuk, taava Inatsisartunut qinersinermik kinguneqartitsissaaq.
Siulittaasunngorniartoq malersugaasutut misigisimasoq
Siumup sapaatip-akunnerata tulliani pingasunngornermiit tallimanngornermut Sisimiuni nuna tamakkerlugu ilaasortat ataatsimeersuarnissaat sioqqullugu, Vittus Qujauktsoq taama naqissusiivoq.
Qinersinissaq nalilersorneqassaaq
- Siulittaasunngorniunnermi ajugaassagaluaruma Nunatsinni qinersisoqarnissaa pissusissamisoorluinnassaaq, Vittus Qujaukitsoq oqarpoq, taanna Kim Kielsenip anguniagarisaanik allaanerulluinnarmik politikkeqarniarpoq.
Siumumi ataatsimeersuartoqarnerani Nunatsinni qinersinerit pingasut kingulliit nalilersorneqartariaqartut, taanna isumaqarpoq.
Kommunimut qinersisoqarnerani Siumut ersarissumik ajorsartoq Vittus Qujaukitsup oqaatigaa, naak ''partii ajorsannginnissamut tunngavissat tamaasa pigigaluarlugit'', taanna taamatut oqarpoq.
Kommunimut qinersinermi pingasut ajutoorutigineqartut
- Sunniuteqartut pingasut Siumumillu eqquisut taaniarpakka. Siullermik Kim Kielsenip aamma Lars-Emil Johansenip akornanni avissaartuunneq. Aappaattut Martha Lund Olsenip soraarsinneqarnera, pitsaanngitsumik suliarineqarnera aamma toqqaannartumik partiimut ajoqusiisoq. Pingajuattullu illoqarfiit pingaarnersaanni suliniuterujussuarmut Kim Kielsenip isumaannakkut pilersaarusiaanerarlugu akerliliinera, taamaaliornikkullu illoqarfiit pingaarnersaata kommuniani politikerinik akerlilersuivoq, Vittus Qujaukitsoq nassuiaavoq.
Aamma atuaruk: Siulittaasunngorniartoq malersugaasutut misigisimasoq
Partii pingaartitaminit allamut nikissimasoq, taanna isumaqarpoq: tassa ersoqatigiinneq.
Innaallagissamut, imermu aamma kiassarnermut akit nunaqarfinni mikisuni tamanut assigiinnissaannik Siumut ukiut arlallit matuma siorna aalajangersimasoq, taassuma unnersuussutigaa. Kisianni taama pisoqarsimanngilaq. Vittus Qujaukitsoq naapertorlugu, maanna aqutsisut sammisaq oqaluuserisassanut pingaartillugu ilanngussimanngimmassuk, tamatumunnga nassuiaatissaanerarpaa.
Taamaatiinnarneq
- Inuit taama amerlatigisut Danmarkimut nuuttarnerat aamma taamaatiinnarneruvoq. Tamanna iliuuseqarfigineqartariaqarpoq, siulittaasutut qinigassanngortittoq oqarpoq.