Parisimi ataatsimeersuarneq
Vittus silap pissusianut isumaqatigiissut pillugu: Pakatsinaqaaq
Silap pissusia pillugu isumaqatigiissut atsiorneqaqqammersoq nunat inoqqaavinut pakatsinarpoq, aningaasanut, aatsitassanut nunanullu allanut tunngasunut naalakkersuisoq oqarpoq
Arfininngormat Parisimi silap pissusia pillugu nunat 196-it isumaqatigiissuteqarmata tamakkua akornanniinnginnatta Kalaallit Nunaat suli pisussaaffeqanngikkaluartoq, Naalakkersuisut pakatsisimapput.
Tassami aningaasanut, aatsitassanut nunanullu allanut tunngasunut Naalakkersuisoq Vittus Qujaukitsoq (S) isumaqarpoq isumaqatigiissutip oqaasertaani diplomatit ´nunat inoqqaavi´ eqqarsaaatiginerusariaqarsimagaluaraat, nammatassaannik pisussaaffiinillu oqilisaaffigalugit.
Amerlanernik immikkut pineqarusuppoq
– Silap pissusiata ajoqutaasumik allanngoriartorneranut, ullumikkut nunarsuarmi tamamrik sunniisumik, nunat inoqqaavi annikitsuaraannarsuarmik sunniuteqarsimapput. Taamaakkaluartoq silap pissusianut isumaqatigiissuteqartut nunat inoqqaavisa immikkut pisinnaatitaaffii, FN-ip ilaatigut nunat inoqqaavisa pisinnaatitaaffii pillugut nalunaarutimigut akuersissutigisimasai, akuerisinnaasimanngilaat. Tamanna pakatsinaqaaq, Qujaukitsoq arfininngormat oqarpoq.
Nunat inoqqaavi nunatut angisuutut silap pissusianut anguniakkamik pisussaaffilerneqassanngillat, Qujaukitsoq isumaqarpoq, naatsorsuutigisariaqarporlu ikinnerussuteqartut allat imaluunniit nunat allat, Kalaallit Nunaat pinnagu, uagut maanna silap pissusianut pisussaaffeqannginnatta, sinnerlugit taamatut oqaaseqaateqartoq.
Isumaqatigiinniarnerit ajornakusoortut
– Nunarsuarmioqatigiit isumaqatigiissutip oqaasertaani uppernarsartariaqarsimagaluarpaat nunat inoqqaavi immikkut ittunik pisinnaatitaaffeqartut, tamatumani ilanngullugu ineriartornissamut pisinnaatitaaffeqarnerat, politikeri arfininngormat unnukkut oqarpoq.
Qujaukitsup qallunaat aallartitaasa ilaattut malinnaaffigisimavai ulluni kingullerni, nammineq taasamisut, isumaqatigiinniarnerit ajornakusoortorujussuit.
Kimigiiserutiginiarsimagaluarpaa silap pissusianut isumaqatigiissummi ilanngunneqassasut nunat inoqqaavinut pituttorsimasumik innersuussutit nunallu inoqqaavisa ineriartornissamut pisinnaatitaaffii, tamakkuli tassa ilanngunneqanngillat.
Isumaqatigiissutikkut nutaakkut akuerineqarpoq nunat inoqqaavisa silap pissusiata allanngoriartorneranut naleqqussarnermut ilisimasaat, nunalli inoqqaavinut pituttorsimanngitsumik innersuussuteqaannarluni.