Vittus Q: Obamap ataatsimiinnermut peqataanera Nunatsinnut iluaqutaavoq

- Ataatsimeersuarnerup takutippaa USAp isummani allanngortissimagaa. Tamanna nuannaarutissaavoq, tassami nunarpassuit allat ukiunut tulliuttunut suliniutissanik arlaqartunik aallartitsereerput.

Naalakkersuisunut ilaasortaq Vittus Qujaukitsoq, Siumut, Alaskamut Anchoragemut tikeqqammerluni oqarpoq.

Ataatsimeersuarneq John Kerrymit pilersinneqartuuvoq, ataatsimeersuarnermilu USA-mi præsidenti Barack Obama peqataassaaq.

Danskit nunanut allanut ministeriat Kristian Jensen aamma peqataassaaq.

- Silaannaap kissatsikkiartornera ilutigalugu Kalaallit Nunaanni sermersuup aakkiartornera uani kisimi oqallisigineqartussaanngitsoq USA-mi innuttaasunut paasissutissiissutigissallugu pingaaruteqarpoq, USA-mimi innuttaasut aamma eqqugaarujussuarsinnaapput. USA-mimi sumiiffinni assigiinngitsuni malunnaatilimmik eqquisareerpoq, soorlu Californiami Coloradomi sumiiffinnilu assigiinngitsuni.

- Kisianni USA suli annertunerusumik tatisimaneqarnerusariaqarpoq, EU-mmi suliniutaanit sakkukinnerujussuupput. Taamaattumik Issittumi najugallit aamma USA-p tatineqarneranut peqataanerusariaqarput, maannakkullu iliuuseqartoqartariaqarnera erseqqissarneqartariaqarluni.

Kristian Jensen aamma Vittus Qujaukitsoq Anchoragemi inunnut 450-inut oqalugiartussaapput ullumi ataasinngornermi. Tusarnaartuusussaapput nunanit assigiinngitsunit nunanut allanut ministerit.

Silaannaap kissatsikkiartornera Kalaallit Nunaannut qanoq sunniuteqarnersoq Vittus Qujaukitsoq ilaatigut oqalugiassaaq.

Avatangiisit kisimik?
USA-p silaannaap pissusaanut soqutiginninnerulernera isornartorsiorneqarpoq, marloqiusamik isumaqartuusutut nalinerneqarluni. Silaannaap kissatsikkiartorneranut atatillugu iliuuseqartoqarnerulernissaa kissaateqartoqartoq aappaatigullu Alaskami immap naqqani uuliasiortoqarnissaa aamma akuersissutigineqarsimanera isornartorsiorneqarpoq.

Aappaatigulli USA-p uunga qanoq iluaqutaasinnaanera aamma apeqquserneqarpoq, USA-mi qanoq annertutigisumik Issittoq pillugu suliniuteqassava?

Nannut arrillu qanoq illersorneqartigissappat, tassami USA-mi demokraatit tunuliaqutaralugit qinigassanngortittup Hillary Clintonip akerleraa Issittumi uuliasiortoqarnissaa.

- Nungusaataanngitsumik ineriartortoqarnissaa tamatta soqutigisaraarput. Silaannaap kissatsikkiartorneranut Issittumiittut annertoorujussuarmik suleqataasinnaanerat ataatsimeersuarnermi saqqummiunneqassaaq, Vittus Qujaukitsoq oqarpoq.

Obama Anchoragemut ataasinngorpat tikikkuni, præsidentini siullersaalluni Alaska tikeraartussaavaa.