Siumumi siulittaasumik qinersineq
Vittus: Bloktilskudeqanngikkaluartoq akissaqarpugut
Nunarput Danmarkimit bloktilskudit tunniuttangai tigussaaraluarpagit nuna namminiilivinnissamut akissaqartoq, Vittus Qujaukitsup Siumumi siulittaasunngorniuunnermi peqataasup oqaatigaa.
Sapaatip-akunnerata tulliani Siumut nuna tamakkerlugu Sisimiuni ataatsimeersuannginnerani, Nunanut Allanut Naalakkersuisuusimasup, Vittus Qujaukitsup, suut siulittaasunngorniuutigissanerlugit oqaluttuarai.
Namminiilivinnissaq salliutinniaraa
"Kiffaanngissuseq Ersoqatigiinnerlu" Vittus Qujaukitsup ataatsimeersuarnermi qulequtaralugit saqqummiussiniarpoq, namminiilivinnissamulli apeqqut pingaartitaraa, taassumami kissaatigaa partiip Nunatta namminiilivinnissaanut sulinera sukkanerusumik ingerlatissagaa.
- Siumut nuna tamakkerlugu ataatsimeersuarnerini kingullerni aqqut suna atorneqassanersoq ersarilluinnartumik aalajangiiffigineqarsimavoq. Massakkulli aqutsisuusut taamatut aalajangersimanernut tatiginanngitsumik sulisimasut paasivakka, siulittaasumut qinigassanngorteqataasoq Sermitsiaq.AG-mut oqarpoq. Taassuma oqartussaaffiit arlallit suliffimmi isumannaallisaanikkut pissutsit, nunanut allanut, qimaasut, inuussutissalerinermut, imarsiornermulli tunngasut tiguneqarsimanngitsut tikkuarpai.
- Oqartussaaffiit arlallit tiguneqarnissaat kinguartinneqarsimapput. Tamanna atorsinnaanngilluinnarpoq, Inatsisartulli aalajangersimasaannik ataqqinninnginnerulluinnarluni, Vittus Qujaukitsoq naqissusiivoq, tikkuarpaali oqartussaaffiit tiguneqarnissaanut kingunissaannut aningaasartuutissaannulli aningaasarpassuit misissuinermi atorneqarsimasut.
- Nammineertariaqarpugut. Danmarkimiilli bloktilskudinik pisartangaqanngikkaluarluta sapernagu ilisimasariaqarparput. Inuuniarnikkut atungarisat ajornerulissapput, tamannali nassuerutiginissaa qunungisariaqanngilarput. Kisianni kaannavianngilagut, Vittus Qujaukitsoq naqissusiivoq.
Allaffissunnginneruneq
Taanna isumaqarpoq ullumikkut aalisarnerup annertuumik aningaasanik isaatitsissutigineqarnera annertummat namminiilivinnissaq piviusorsiortoq.
- Tamannali iluatsissappat soorunami allannguisariaqarpugut. Ilaatigut allaffissornerujussuaq aningaasat atorneqartartut ikilisarneqassapput. Siunissami suliffeqarfinngorumaartussat Nunatsinniitinneqarnissaanik piumasaqaatit sukateriffigissavagut. Aalisakkanillu tunissassianik pitsanngorsaanerit Nunatsinni ingerlanneqartalertuuppata aningaasanik amerlanernik pissarsisalissangaluarluta, Vittus Qujaukitsoq oqarpoq.
Kulturimut, timersornermut isumaginninnermullu tunngassutillit annertunerusumik suliniutigineqalerpata ataatsimoorniarnermi ajornartorsiutit qaangerneqassangaluartut, taanna isumaqarpoq. Piginnaasat innuttaasuniipput eqeersimaarnerusariaqarpugulli.
Kajumissutsiminik suleqataasut akileraarusigassanut ilanngaataat
- Kajumissutsiminnik suliallit piginnaasaat atorluarnerisigut oqartussat oqiliassaaffigineqarsinnaasut, Vittus Qujaukitsup oqaatigaa, kajumissutsiminillu suliaqartut akileraartarnikkut oqilisaaffigineqarnissaat siunnersuutigalugu.
Allannguutissatut siunnersuutit amerlasoorujuupput. Taamaammat Vittus Qujaukitsup nuna tamakkerlugu ataatsimeersuarnermi siunnersuutini annertuut aallartitanut tunniunniarpai, tassani politikkikkut anguniagai suunersut takuneqarsinnaassallutik.