Vittus: Atomip nukinga nukissiuut minguitsuuvoq

Kalaallit Nunaat maanna nunat uranisiortut uranimillu atuisut akornannut ilaasortanngorpoq. Tamanna ataasinngornermi septembarip 26-anni IAEA-p Wienimi ataatsimeersuarnerani pivoq.

Ataatsimeersuarnerup nalaani malunnartitsiniaanermi nunanut allanut inuussutissarsiornermullu naalakkersuisup Vittus Qujaukitsup (S) allakkat atsiorneqarsimasut IAEA-p allattaaneranut Yukiya Amanomut tunniuppai, taakkulu atortunut qinngornilinnut isumannaallisaanermi aalajangersakkat qitiusut marluk atuutilernerannik kinguneqarput.

Tassani pineqarput, qinngornilinnik isumannaallisaaneq pillugu aalajangersagaq aamma qinngornilinnik ajutoortoqartillugu ikiorneqartarneq pillugu aalajangersagaq. Taakku aalajangersakkat Kalaallit Nunaata uranisiornissaanut pisinnaatitsisuupput.

Isumannaallisaaneq pitsaanerpaassaaq
Vittus Qujaukitsup malunnartitsiniarnermi isumannaallisaanerup pitsaanerpaanissaa pingaartuus oqaatigaa.

- Uranip atorluarneqarsinnaanera sioqqullugu, atortussiat radiop qinngorneranik qinngornitalinnut innuttaasut aammalu aammalu sulisut illersorniarlugit naammassisaqariusunik aaqqissuussisoqarnissaa, Naalakkersuisunut tunngaviulluinnarpoq.

Taanna atortussiat peqqarniisaarnianit pissarsiarineqannginnissaat qulakkeerniarlugu aamma illersorneqarnissaat pingaartuusoq oqarpoq.

Urani silaannaap kissatsikkiartorneranut akiuutitut
Piumasaqaatit taakku naammassineqarpata, uranimik piiaaneq silap pissusaata allanngoriartorneranut akiuinermut ilaasutut naalakkersuisup isigaa.

- Aatsitassanik qaqutigoortunik aamma uranimik Kalaallit Nunaat immikkuullarissumik isumallutissaateqarpoq, taakkulu silap pissusiata allanngoriartorneranut iluaqutaasumik mingutsitsinngitsumik nukissiornermut atorneqarsinnaapput, Vittus Qujaukitsoq oqarpoq.

Oqalugiarninilu iluatsillugu IAEA-p allattaanerata, Yukiya Amanop, Kalaallit Nunaannut tikeraarnissaanut qaaqqusivoq.