Aningaasanudt inatsit 2015
Vittus: – Aningaasaqarnikkut imminut napatittumik ingerlatsissaagut
Aningaasanik inatsisip nutaap amerlasuunik tapersersorneqartussap ilusilersornissaanut aningaasaqarnermut Naalakkersuisup kikkut tamaasa ilaserai
– Aningaasanut inatsisissatut siunnersuut saqqummiunneqaraangat nalinginnaasuulluinnarpoq partiit, ilaasortat inuussutissarsiortullu eqqarsaatiminnik isummaminnillu saqqummiussisarnerat. Tamanna oqartussaaqataanerup ilagaa nalinginnaasuulluinnartoq, aningaasaqarnermut nunallu iluani pissutsinut Naalakkersuisoq Vittus Qujaukitsoq, Siumut, IA-p toqqissisimannginneq pillugu ammasumik allagaanut akissuteqarluni allappoq.
– Aningaasanut inatsimmik oqimaaqatigiissumik sananiarneq imaannaanngitsuuvoq, amerlasuutigullu sukkut tamatigut ikililerisoqartariaqartarpoq. Suliassarli ingerlanneqarpoq nunap aningaasaqarnikkut imminut napatittumik ingerlanissaa anguniarlugu. Aningaasaqarniarnermut erloqinarpoq, qularutissaanngilarlu allaanerusumik eqqarsartariaqartugut maanna atugarissaarneq attatiinnassagutsigu, Qujaukitsoq erseqqissaavoq.
Naalakkersuisut aaqqissuusseqqinnernik ingerlatsileruttorput, maannalu pisortat ingerlatseriaasiat pitsanngorsarlugulu eqqarsartariaatsimik nutaamik periusissarsiorniarlugu, Vittus Qujaukitsoq tikkuaavoq.
– Aaqqissuusseqqinnerit ataasiakkaarlugit sakkortorpasissinnaapput, aaqqissuusseqqinnernili ataatsimut anguniagaavoq inuiaqatigiinni sanngiinnerpaat isumagineqarnissaat, imminullu pilersorsinnaanissatsinnut sinaakkutassat qulakkeerlugit, inuussutissarsiortut nukittorsaqataaffigalugit inuiaqatigiinnilu siuariartortitseqataalluta.
Inuussutissarsiortut tikilluaqqusaapput
– Aappaagumut aningaasanut inatsimmik amerlasuunit tapersersorneqanngitsumik Naalakkersuisut sanarusunngillat. Taamaattumik partiit tamaasa isumaqatigiinniarnissamut qaaqqusimavakka. Partiinut piumasaqaatituaraara isumaqatigissagaat IS (Ingerlatsineq Sanaartornerlu) 2014-imiit 2018-imut oqimaaqatigiissasoq, siunnersuutillu aningaasalerneqarnissaat siunnersuusiorneqassasut oqimaaqatigiissitsineq attatiinnarlugu. Ilanngullugu inuussutissarsiortut pingasoqiusamik ataatsimeeqatiseriniarpakka aningaasanut inatsit piffissanut sivisuumut atasinnaasoq inuiaqatigiinnilu siuartornermik pilersitsisoq anguniarlugu, aningaasaqarnermut Naalakkersuisoq allappoq.
– Tamattami isumassaarsiaqarsinnaavugut aningaasat amerlanerusut sumi atussanerivut, nunalli aningaasaataasa killeqarnerat pissutigalugu pisariaqarpoq aningaasat sammisanit allanit tiguneqarnissaat. Assersuutigalugu Naalakkersuisut 2015-imut Aningaasanut Inatsisissatut siunnersuumminni pisortat allaffissornerat sipaarniuteqarfigaat, ilaatigut piginnaanngorsaanikkut aningaasaliissuteqarnikkullu, digitalimik atuinermik siuarsaasumik.
– Neriuudtigaara kikkut tamarmik qaaqquneqarnertik qujarutissagaat, kissaatinillu siunnersuutinillu piviusorpalaartunik saqqummiussillutik. Kalaallit Nunaata aningaasaqarnikkut siunissaanik isumaqatigiinniarnissat qilanaaraakka.