Vittup Sermitsiaq.AG eqqunngitsumik pasilliinerarlugu eqqartuussivilersuunniarlugu sioorasaarpaa
Nunat tamalaat iluanaaruteqannginnissamut isumaqatigiissuteqaraluartut, Kalaallit Nunaata silaannaatigut timmisartornikkut Danmark iluanaapiluppoq, Vittus Qujaukitsoq oqarpoq. Ajuallatsitaaneq pillugu eqqartuussisulersuussinissamik taanna Sermitsiaq.AG-mut kalerriuteqarpoq.
Kalaallit Nunaata qulaani silaannakkut timmisartornikkut Naviair naalagaaffimmit pigineqartoq ukiumut 70 millionit koruunit missaanni isertitaqartarpoq. Vittus Qujaukitsoq mailikkut Sermitsiaq.AG-mut taama allappoq, taamatullu oqarneranik ilumoornerarneqanngippat ajuallatsitaaneq pillugu eqqartuussisulersuussinissamik oqariartuuteqarpoq.
Tunngavilersuut
- Kalaallit Nunaannut angalaneq 6 % sinnerlugu ingerlatseqatigiiffiup ukiumut isertitaanik tapiisarpoq, tamannalu aningaasartuutit matussusereerlugit 70 millionit koruuninut naapertuuppoq, Vittus Qujaukitsoq allappoq, tassanilu ‘’Naviair taamaalilluni iluanaarujussuartarpoq, angalasoqarnerulerneranilu qaffalluni’’.
Taamaalillunilu ‘paasisat piviusuunngitsut’ qineqqusaarnermut ilanngupput. Pissutsit piviusut imaapput, nunattamalaat isumaqatigiissuteqarfiginerisigut Danmark silaannakkut angallannermik nakkutilliinermik ingerlatsisussatut pisussaaffilerneqarpoq, tassanilu iluanaaruteqaranilu amigartooruteqarsinnaatitaanngilaq. Tassani nikingassutaasut naatsorsuiffiusuni tullerni aaqqiiffigineqartarput, inerneralu tassani iluanaarutaaffiunanilu amigartoorfiuneq ajorpoq.
Qaammataasat iluanaarutigineqartut?
Nunatta Qitornaanni pilersinneqaqqammersumi siulittaasup mailimini aamma oqaatigaa, Naviairip suliffeqarfimmi Aireonimi aktiaatit 6 procentii pigigai, taannalu nunarsuaq tamakkerlugu qaammataasatigut timmisartut angallannerannik nakkutilliisumik pilersitsilersoq. Taanna suli tamakkiisumik atuutilinngilaq, kisianni Naviair – taamaalillunilu danskit naalagaaffiat – piginneqataanermigut aningaasanik iluanaaruteqartoq, Vittus Qujaukitsup ilisimanerarpaa.
Naak aktianik piginneqataagaluarluni qaammataasanit paasissutissanik atuinermut atuisut allat assigalugit Naviair akiliisarluni, Sermitsiaq.AG-mut ilisimatitsivoq. Aireonimut aningaasaliissutit naalagaaffiup karsianeersut nunatta karsianeersuunngitsut 200 millionit koruunit missaanniipput, aatsaallu ukiorpaalussuit qaangiuppata utertinneqartussaapput.
Kalaallit Nunaata qulaani timmisartuussinerpassuit
Qujaukitsup oqarnera naapertorlugu, nunarput qulaallugu silaannakkut angallattut ukiumut ‘’260.000-t Kalaallit Nunaat qulaallugu timmisartut’’ missaanniipput. Kisitsisit taakku Naviairimi tupigusutsitsipput, taakku taamaallaat ukiumut 60.000-t missaat Kalaallit Nunaat qulaallugu timmisartortunik nalunaarsuisarput.
Kalaallit Nunaata silaannaa qulaallugu timmisartut ukiumut qulaattartut sanilliukkaanni, amerlaqataat Danmarkip silaannaa qulaallugu qaammammut silaannakkut qulaattarput.