nunanut allanut politikki
Vittu Taiwanimukartussaagaluarpoq
Taiwanimi illoqarfiani pingaarnermi Taipei-mi aaqqissuussami Greenland Day-imi Vittus Qujaukitsoq ammaasussaasimagaluarpoq
Novembarip aallaqqaataani nalunaaqutaq qulingiluanut Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut Naalakkersuisoq Vittus Qujaukitsoq (S) Greenland Day-mi Taiwanip illoqarfiani pingaarnermi Taipeimi peqataasunut tikilluaqqusisussaasimagaluarpoq.
Tamanna pilersaarummi Sermitsiaq.AG-p pissarsiarisimasaarut atuarneqarsinnaavoq.
Vittus Qujaukitsorli (S) Taiwanimukarsimanngilaq.
Pisortatigoortumik attaveqaqatigiinneq Kinap akuerinngilaa
Kineserit nunanut allanut naalakkersuisoqarfiata oqaaseqartartuanut tikeraartoqarnissaraluanik taamaatiinnarsimanersoq tallimanngormat tusagassiortunik katersortitsisoqarmat apeqqutigineqarsimasoq Sermitsiaq.AG-p oqaluttuarereerpaa.
Oqaaseqartartulli toqqaannaq akissuteqarani oqaatigaa Kinap nunat suleqatigisai Taiwanimit attaveqaqateqarnisaat Kinap akuerinngikkaa naqissuserpaa.
Kinamit peqquneqarneq naalakkersuisoqarfiup akerlilerpaa
Naalakkersuisulli Taiwanimut tikeraarnissaraluata Kinamit piumasarineqannginnerarlugu pasitsaassineq Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut naalakkersuisoqarfiup ilumuunnginnerarpaa.
Vittus Qujaukitsulli Taiwanimut tikeraarnissaanik pilersaarusiortoqarsimanngitsoq mailikkut nassuiaatigaa.
- Taiwanip aallartitaanik pisortatigoortumik naapittoqarnissaanik pilersaarusiortoqarnikuunngilaq. Naalakkersuisup angalanissaa Kalaallit Nunaata oqartussaanit aalajangerneqartarput. Taiwanimilu aaqqissuussamut naalakkersuisup peqataaqqusaanera pingaarnersiuinikkut peqataaffigineqassanngitsoq aalajangiunneqarsimalluni, Sermitsiaq.AG-mut akissummi ilaatigut allassimavoq.
Greeland Day-mut pilersaarut allaaserisap talerpia tungaani atuarneqarsinnaavoq.