aqutsisut
Visit Greenlandip pisortaanini annaavaa
Upernaaq Visit Greenlandip pisortaanini Anders Stenbakken annaavaa, massakkulli pisortaangerungallartoq aamma annaalerpaat. Aaqqissuussaanikkulli ajornartorsiuteqartoqanngitsoq, siulersuisuni siulittaasup Kenneth Høeghip oqaatigaa.
Siullermik pisortaaneq Anders Stenbakken KNI-mi atorfimmut nuuttussaanini pissutigalugu Visit Greenland qimappaa. Sapaatillu akunnialui qaangiuppata pisortaangerungallartup Anders la Cour Vahlip Air Greenlandimi chefanalytikerinngornissani pissutigalugu takornariaqartitsivik qimassavaa.
Aqutsisoqarniapiloortut
Aqutsisoqarniapiloorneq siulersuisuni siulittaasup Kenneth Høeghip maannamut ernumassutiginngilaa.
- Andersikkut ukiuni arlalinni aaqqissuussaanermik pitsaasumik toqqammaviliinikuupput. Aap, aaqqissuussaanermi ajornartorsiuteqanngilagut. Killormuanillu ingerlalluartuuvoq. Taamaammat pisut tunngavingalugit ernumassutissaqanngilanga, Kenneth Høegh Sermitsiaq.AG-mut oqarpoq.
Upernaaq takornariaqartitsivimmi pisortaanissarsiortoqarnikuuvoq, piukkunnaatilimmillu qinnuteqartoqarsimanani.
- Sapaatip akunnera ingerlasoq naatinnagu pisortaanissarsiornermut allagarseeqqinnissarput naatsorsuutigaara, siulersuisuni siulittaasoq oqaluttuarpoq. Pisortaanginngortussap Andes la Cour Vahlip atorfigisimasaa allamik inuttalernissaa siullertut suliassarissagaa ilanngullugu paasissutissiaraa.
Pisortaanerit taamaatittoq taamaatittussanngortorli misilittagartuujupput. Anders Stenbakkeni ukiuni arfineq marlunni Visit Greenlandimi atorfeqarsimavoq, Anders la Cour Vahlilu ukiuni 15-ni atorfeqarsimalluni.
Ukioq naatinnagu pisortaanertaassasut
Pisortaanertaarnissap tugaanut – siulersuisuni siulittaasoq naapertorlugu "kingusinnerpaamik ukiup naanerani" pissaaq – nukiit misilittagallit aqutsisoqarneq tigummigallassavaat.
Lykke Geisler Yakaboylu 1998-miillu Visit Greenlandimi sulisimasoq 1. septemberimiit pisortaaninngorallassaaq, Mads Daniel Skiftelu souschefiungallartutut atorfeqaannassalluni. Taanna ukiut kingulliit 17-t nunap immikkoortoqarfiini ukkatarinnissimavoq taamaammaallu angalangaatsiartarluni.
Takornariaqartitsinermik saqqummersitsinermut aaqqissuisut
Visit Greenland septembarip qaammataani nunat tamalaat akornanniit 400-t tikillugit orninneqartussami Vestnorden Travel Martimik aaqqissuisussaavoq.
- Saqqummersitsinissamut aqutsisoqarniapiloornerput malunniuteqassanngilaq, Kenneth Høegh oqarpoq.
- Vestnorden Travel Mart ajunngitsumik ingerlanneqassaaq, siulersuisuni siulittaasoq naqissusiivoq.
Sulisut 14-it
Ullumikkut Visit Greenlandimi, Nuummi Nuutoqqami allaffimmi sulisorineqartut 14-iupput.