Visit Greenlandip isornartorsiuineq tunuartippaa

Kalaallit Nunaanni Takornariaqarnermut Siunnersuisoqatigiit Visit Greenlandip ilisarisinnaanngilaa Kalaallit Nunaata ukiuni kingullerni Danmarkimit takornarianik pissarsiniarnissaq tunulliussimagaa.
Taamatut isornartorsiuivoq Lene Mortensen, Nordic Adventure-mik piginnittuusimasoq ukiunilu kingullerni qulini Kalaallit Nunaata Angalatitsiviani sulisimasoq.
Taassuma atuagassiami Travel People-mi kingullermik saqqummersumi kalaallit oqartussaasui saassuppai ukiuni kingullerni Danmarkimi ussassaarisarsimanngimmata.
– Kalaallit Nunaata Angalatitsiviani suliunnarnissara sioqqullugu paasineqarpoq Kalaallit Nunaannut takornariat ikileriarsimasut, ineriartornerlu tamanna soorunami ataasiinnarmik nassuiaatissaqarpoq, taanna Travel People-mit apersorneqarluni oqarpoq.
– Aningaasarsiornikkut ajornartorsiornerup pisuutinnissaa qaninnerpaagaluarpoq. Qularnanngitsumillu aamma tamanna pisooqataavoq. Qularutiginngilarali ukiuni kingullerni qulini Kalaallit Nunaata Danmarkimi ussassaarutigineqarsimannginnera maanna malunniuttoq, taanna oqarpoq.
Big Active Five
Akerlianik Visit Greenlandip pisortaata Anders Stenbakkenip erseqqissarpaa takornariaqarnermut siunnersuisoqatigiit takornariaqarnermik ingerlatsiviit allat arlallit peqatigalugit siorna Danmarkimi ussassaarutigisimagaat "Big Active Five", 1,6 millioner koruuninik nalilik.
Aamma atuaruk: Nunatta takornarianut ussassaarinera saassunneqartoq
Aamma atuaruk: Takornariat paasiniaaffigaat
Ussassaarinermi immikkoortut pingaarnerit tallimat Nunatsinnut ussassaarutigineqarput: Arferit, qimusserneq, arsarnerit, sermeq minnerunngitsumillu nuna maligassiuisulik.
– Taamaasilluta ussassaarut tuniniaavimmut, ilisimalluariikkatsinnut, misilipparput. Taamaasilluta Danmarkimi tuniniaavik tunulliussimanngilarput. Allaanerusumilli tulleriiaarivugut Danmarkiinnavik samminatigu, Anders Stenbakken sapaatiummat angalanernik takutitsinermut Vestnorden Travel Martimut atatillugu tusagassiortunik katersortitsinermi oqarpoq.
Tamatumunnga atatillugu tikkuarpaa Kalaallit Nunaat ukiuni kingullerni tikikkuminarnerulersimasoq, tassa Air Iceland aamma Air Greenland Islandip Danmarkillu akornanni timmisartuussisarmata. Timmisartuussiviillu pissutigalugit angalanernik tunisisoqarsinnaavoq, takornariat siullermik Islandimeeriarlutik Kalaallit Nunaannut tikeraapallassinnaallutik.
– Ussassaarinitsinni nunap immikkoortui immikkut sammiunnaarpavut, immikkoortulli sammilersimallugit. Angalasullu misigisassarsiorusuttut nunarsuarmi amerlaqaat, Anders Stenbakken oqarpoq.