pilerisaarineq
Visit Greenland: Finlandimiut juulimaaq pisinnaavaat
Visit Greenland naapertorlugu Finlandip juulimaaq pisinnaavaat. Taannami juulliaqqami tunissuteqarluartaraluarluni aningaasartaqanngilaq.
Finlandimi erseqqissaatigineqangaatsiartarpoq juulimaaq issittumi tassani najugaqartuunera. Taamaakkaluartoq meerarpassuit ukiut tamaasa juullimut kissaatitik Nunatsinnut nassiuttaarpaat, taakkumi upperaat juulimaaq tamaani najugaqartuusoq.
Soqutiginanngitsoq
Takorluuinerli taanna takorniaqartitsiviup pigiinnarnissaa soqutiginngilaa.
- Juulimaaq Kalaallit Nunaaninngaanneersuunnera Danmarkimi ilisimaneqarpoq. Nunanilu allani taanna Finlandimut attuumassuteqarnerangaasarluni. Finlandimiullu iliuuserisaat uagut unammillersinnaanngilarput, Lykke Geisler Yakaboylu, Visit Greenlandimi pisortaasoq dr.dk-mut oqarpoq.
Finlandimiut isumaqarput juulimaaq Laplandimi najugaqartuusoq, illoqarfimmilu suliffeqarfissualiortoqarsimavoq "Santa Claus Village"-mik atserlugu, taanna parkiuvoq nuannaarniartarfik pisiniarfeqarlunilu neriniartarfilik.
Finlandimiut iliuussaat unammilleruminaatsuusoq, Visit Greenlandimi pisortaq isumaqarpoq.
Arsarnerit qimussillu
- Uagut Kalaallit Nunaanni misigisassarsiorfittut ilisimaneqarnererusuppugut, Finlandimiunummi "Disneyshow"-iannut sanillersuulluta, Arsarnerit qimussernerlu misigineqarsinnaapput. Tamanna unammillerutigerusunngilarput. Misiliigaluarnikuuvugut iluatsitsinatali, taamaammat uagut tungitsinniik juulimaaq Finlandip pisinnaavaa, Lykke Geisler Yakaboylu dr.dk-mut oqarpoq.
Ukiut arlaqanngitsut matuma illoqarfiit pingaarnersaanni allaffeeraqarsimangaluarpoq, tassani juulimaamut allakkat nassiunneqarsinnaasarput akineqartarlutillu. Tamannalu aningaasatigut iluanaarutitaqarfiusimanngitsoq, pisortaaneq pilerisaarinermi juulimaamik atuerusunngitsoq erseqqissaavoq.