suna inuussutigissavarput

Video takuuk: Sulisitsisut nalliuttorsiornermi annertuumik unammisitsivoq

Ukiut 50-it tulliuttut suna nappatigissavarput, suliniaqatigiiffik taama aperivoq

Siunissami suna nappatigissaneripput oqallisigineqarnissaanut Sulisitsisut saqqummiussipput

Ukioq manna Sulisitsisut kattuffiat ukiunik 50-inngortorsiorpoq. Tassungalu atatillugu kattuffik 'Siunissarput malersorlugu' saqqummiussivoq, tassa ukiuni tulliuttuni 50-ini innuttaasut sunik kissaateqarnerat pillugu tamat oqallinnissaat anguniarneqassalluni. Naatsumik oqaatigalugu: Siunissami suna nappatigissavarput?

– Nalliuttorsiorneq kingumut qivialaarnissamut periarfissiivoq, tassami ukiuni 50-ini qaangiuttuni Kalaallit Nunaata peqatigaluta angusimasai Sulisitsisuni tulluusimaarutigaavut, Sulisitsisut tusagassiuutinut nalunaarummi naqissusiipput.

– Aammali ‘Siunisarput malersorlugu’ siumut isigaluni sammineqassaaq, tassami siunissamik qanoq ittumik kissaateqarnerluta oqaloqatigiinnissarput pingaartuuvoq. Sumut ingerlassanerluta nalugutsigu, taava aqqutissatta pilersaarusiornissaa sapissavarput.

Filmiliaq
Sammineqartussami sarsuasuliaq, sarsuasulianik suliaqartartup Jørgen Chemnitzip suliaa 'Ulloq Nunatsinni nutaajuvoq' aallaavigineqassaaq.

Nunatsinni pinngortitaq peqqarniitsoq, qannganngortoq inooriaaserlu ileqqorineqarsimasoq ullutsinni inuussutissarsiornermut saarsuasuliami naleqqiunneqarput.

Unammisitsineq
Sammisaqarnermi sarsuasuliap saniatigut aamma kalaallit tusagassiorfiisigut nittarsaassisoqartassaaq Facebookikkullu unammisitsisoqassalluni, tamatumani innuttaasut tamarmik siunissami sunik nappateqarnissarput pillugu sinnattuminnik, taavalu sinnattoq anguneqassappat tamanna qanoq anguneqarsinnaanersoq ilanngullugu, siaruaassinissaminnut kaammattorneqassallutik.

– Sammisaqartitsinermi Sulisitsut inuussutissarsiummillu ingerlatallit inuiaqatigiinnit pisariaqartinneqarneri iluaqutaanerilu pillugit paasinnittaatsip pitsanngorsarneqarnissaa anguniarneqarpoq. Inuussutissarsiortut inuillu suleqatigiittut siunissamut pitsaasumut ammaassisussaapput.

Oktobarip 20-ani pilersinneqartoq
Suliniaqatigiiffik Kalaallit Nunaanni Sanaartornermik Tunisassionermillu Sulisitsisut Peqatigiiffiat (DGA) 20. oktober 1966 pilersinneqarpoq, Nuummi suliffeqarfiit 17-it tunuliaqutaralugit. Nalliuttorsiorneq aamma novembarimi atuakkamik saqqummersertitsinikkut malunnartinniarneqassaaq.

Suliniaqatigiiffik taajuminarninngorlugu Kalaallit Nunaanni Sulisitsisut-nik (GA) 1982-imi taaguuserneqarpoq. 2015-imi aallartitat ataatsimeersuarneranni aalajangerneqarpoq tamakkiinerusumik taaguuteqartinneqalissasoq Kalaallit Nunaanni Inuussutissarsiortut/Sulisitsisut (GE).

Ukiumi nalliuttorsiorfiusumik suliniaqatigiiffik suliffeqarfinnik 300-t sinnerlugit amerlassusilinnik ilaasortaqarpoq, taakkulu Kalaallit Nunaannit tamarmeersuupput, namminerlu suliffiutillit akissarsiarisittagaasa 80 procentiisa missaat akissarsiaritittarlugit.

Uani allaaserisap ataani filmiliaq takuuk

Powered by Labrador CMS