Nuuk
Video takuuk: Qaarsunit angutit sisamat pole push-imi GM-imi pissartanngortut
Arctic Sportsimi Dene Gamesimilu Nunatsinni pissartanngorniunnermi angutit pole pushimik ajugaanniupput
Qaarsuneersut angutit sisamat nukittoqisut pole pushimi Kalaallit Nunaanni pissartanngorput. Unamminermi orpiup timitaa atorneqarpoq, tassani unammisut imminnut tungiminnut ajattaattarlutik. Unamminermi Qaarsunit, Uummannamit Nuummiillu unammipput.
Arctic Sports amma Dene Gamesini Nunatsinni pissartanngorniunnerit Nuummi ingerlanneqartumi unammipput. Indiaanerit unammissutaat unammissutigineqartalerput aamma Nunatsinni, Arctic Winter Gamesimilu kingullermik unammisoqarmat pole pushimi aamma kalaallit kuultinnapput.
Nunaqarfimmiut nukittuut
Nunatsinni pissartanngorniunnermi illoqarfinnit nunaqarfimmiillu pingasunit peqataasoqarpoq, tassa Nuuk, Uummannaq aamma Qaarsut.
Qaarsummiut Nuummiunut Uummannarmiunullu ajugaapput, Uummannarmiut Nuummiunut ajugaasut. Qaarsummiut Uummannarmiullu pissartanngorniunneranni Qaarsummiut ajugaapput. Qaarsummiut marloriarlutik ajugaareernermi kingorna pissartatut imminut taasinnaalerput.
Edvard Kruse, Julius Amossen, Ernitsiaq Amossen aamma Qasiaq Kruse nunatsinni pissartanngorput, Uummannarmiut sølvinnattut kiisalu Nuummiut bronzennallutik.
Unamminerit Nuussuup atuarfiata eqaarsaartarfiani nalunaaqutaq 14.00 aallarteqqissapput.
Video ataani takuuk (takusinnaanngikkukku una tooruk)