piginnaanillit
Video takuuk: ’Ísland Got Talent’-imi Thelma nuannarineqarluartoq
19-nik ukiulik Thelma Kajsdóttir Lyberth Islandimi piginnaanilinnut unammisitsinermi ingerlaqqippoq sapaatiummat. Takutitsilluartorujussuuvoq
- Oqaaseqarpiarsinnaanngilangaluunniit. Nuannarisorujussuuakkit. Takutitsilluartorujussuuvutit, inngilisut erinaqarputit. Aamma kitaarersinnaavutit. I’m kind of having a crush on you.
Naliliisut sisamaasut ilaat 19-nik ukiulimmut Qaqortumeersumut Thelma Kajsdóttir Lyberthimut oqarpoq. Thelma Kajsdóttir Lyberthip takutitsinera naliliisartunit nersualaarneqartorujussuuvoq, ’Ísland Got Talent’-imilu ingerlaqqinnissaa aalajangerneqarluni.
Thelma Kajsdóttir Lyberthip erinaginnini, kitaarillaqqinnini kalaallisullu erinarsornini takutippaa. Unammisitsinermi ingerlaqqinnini inuttaata aamma nuannaarutigeqaa.
Nipilersortartunngorusuppoq
- Misigisaq nuanneqaaq. Takutitsinera toqqissisimanarteqaara. Nipilersortartutut sassarnissannut annilaangasarnera qaangerniarlugu unammisitsinermut ilaavunga. Ingerlalluarlungalu oqaatigisinnaavara, Thelma Kajsdóttir Lyberth Sermitsiaq.AG-mut oqarpoq Nuummit Qaqortulialinnginnermini ataasinngornerup ullaani.
- Nipilersorneq nuannarisorujussuuara, siunissamimi nipilersortartunngorusuppunga. ’Ísland Got Talent’-imi peqataaninni periarfissat amerlanerulernissaat kissaatigalugu peqataavunga, Thelma Kajsdóttir Lyberth oqarpoq. Anaanaa, Edda Lyberth, islandermiuuvoq ataataalu Kaj Lyberth kalaaliuvoq nipilersortarnerminut ilisimaneqartoq.
- Islandimi kalaallisut erinarsornerit qanoq igaajuk, islandermiummi kalaallisut paasisinnaanngillat?
- Misigisara immikkuullarippoq. Sunami erinarsorneriga paasisinnaanngilaat. Kalaallit Nunaat sinnerlugu erinarsornera tulluusimaarutigeqaara, Thelma Kajsdóttir Lyberth oqaluttuarpoq. Aappariinnermi ingerlariaqqissinnaanerup pingaaruteqassusaa pillugu erinarsorpoq.
Nalunngisaminit kaammattorneqareerami ’Ísland Got Talent’-imut peqataanissaminut aalajangerpoq. Ikinngutinilu videoliartik ’Ísland Got Talent’-imut nassiuppaat. Unammisitsisut Thelma Kajsdóttir Lyberthip Islandiliarnissaa isumagaat.
Susoqassanersoq oqaatigisinnaanngilaa
’Ísland Got Talent’ sapaatiummat takutinneqaqqaarpoq, taannalu oktobarimi immiussaalluni.
Unammisitsinermi qanoq ingerlariaqqissimanerluni Thelma Kajsdóttir Lyberthip oqaatigisinnaanngikkallarpaa.
’Ísland Got Talent’-imi unammisitsisoqalerpat sms-ikkut taasisoqarsinnaalerumaarpoq.
Thelma Kajsdóttir Lyberthip Ísland Got Talent’-imi erinarsornera ataani takuuk: