Aallartitsisut
Video takujuk: Pisiniaq Maikip sikuliaanik ullormut 3.000 literimik pisisarniartoq
Aallartitsisutut unammilligassarpassuaqarpoq, tamanna Sermersuup Inuussutissarsiornermut Siunnersuisoqatigiivisa videoliaanni nutaami takuneqarsinnaavoq
Namminersortunngorluni isumassarsiallu piviusunngortinniarnerani periarfissarpassuaqarpoq, aammattaarli nakkariarfissarpassuaqarluni.
Siunnersorneqarnermi sinaakkutat
Tamanna takuneqarsinnaavoq Sermersuup Inuussutissarsiornermut Siunnersuisoqatigiivisa videoliarititaani nutaami ´Kalaallit Nunaanni aallartitsineq´, tassanilu Nuummi aallartitsinermik suliniutit arlallit oqaluttuarineqarput, paasissutissalerlugu aallartitsinermi siunnersorneqarnermut sinaakkutassat suunersut.
Video Jørgen Chemnitzimit sananeqarsimavoq.
Annertuallaamik pisiniartoq
Videomi peqataasut ilagaat Maik Carretero, Greenland Ice-mik piginnittoq, taassumalu akunnattoorsimanini oqaluttuaraa, tassa 2014-imi kinguleqqiutitut sikuliani nunarsuarmi qeqertat annersaasa avataanut tuniniarnialeramigit. Aallartitsisoq sukkasuumik nioqqutissiaminik pisiumasumik oqaloqatiginnilerpoq. Isumaqatigiissuteqarnissarli imaasiallaannaq pisinnaanngilaq.
– Taassuma ullormut siku 3.000 literi pisiarisarusuppaa. Ila annertoqaaq, Maik Carretero oqaluttuarpoq, nassuerutigaalu sikuliassaq taama annertutigisoq maannakkorpiaq naammassisinnaanngikkini.
Maik Carreterop sikunik suliniutaanik oqaluttuaq tamaat aallartitsisullu allat ilisaritinneqarnerat videokut ataani takukkit. Video qulleq kalaallisuujuvoq, allerlu qallunaatuujulluni