Video: Small Time Giantsikkut nuannaarput - saqqummersitsisussanngorput

Nipilersortartut Small Time Giants aningaasanik katersinerat pillugu Sermitsiaq.AG-mi ataasinngornerup ullaavani allaaserisaqarpoq. Aningaasanillu katersinertik iluatsippaat.

Qaammatini kingullerni pingasuni aningaasanik katersipput crowfunding atorlugu, saqqummersitassaminnut 'Stethoscope’-mut aningaasanik katersillutik.

Aningaasanik katersinerminni 94 procenti ataasinngormat killippaat, 53.000 koruunit tikillugit.

Maannakkut aningaasat 55.500 koruunit tikippaat. Aningaasanik katersinertik ulluni arfinilinni suli ingerlatissavaat, 104 procentiulluni maannakkut.

- Suut tamarmik sukkatseriataarnerat nuanneqaaq takullugu, Small Time Giantsimi erinarsortoq Miki Jensen Sermitsiaq.AG-mut oqarpoq.

- Anguniagarput angugatsigu sungiusartarfitsinni nuannaartupilussuuvugut, Faxe Kondituulluta nunatta kujataanilu nipilersoriarnissatsinnut piareersarluta. Inuppassuit uunga akuusimanerat nuannaarutigisorujussuuarput. Arlaleriarluta eqqarsartaraluarpugut anguniagarput angunaviarnagu, qaammallu kingulleq saqqummersitassarput kinguartinniarlugu eqqarsaleraluarluta. Maannakkut pilluaqquneqaqattaarpugut inuppassuarnit saqqummersitsinissarput piviusunngormat, nuannaaqisoq Miki Jensen oqarpoq.

Saqqummersitsinermi tusarnaartitsinerit
Nangipporlu:

- Siumoortumik amerlasuunik saqqummersitassarput pisiarineqarpoq, saqqummersitassarpummi suli naammassinngilaq. Saqqummersitassarput uagut kisitta tusaanikuuarput. Taamaattumik nuannaarutigisorujussuuarput tusarnaartartutta tatigaluta aningaasaliiffigimmatigut.

- Saqqummersitarput suli pisiniarfinni pisiassaalinnginnerani siumoortumik pisisut saqqummersitarput tigussavaat, single-lu siulleq saqqummersitarput siulliullutik aamma tigussallugu. Taamaammat suli aningaasaliisoqarsinnaavoq, Miki Jensen kaammattuuteqarpoq. Small Time Giants postrockimik, indierockimik digitale samplesimillu nipilersoriaaseqarput.

Saqqummersitassaminnik immiussinertik tallimanngorpat naggasissavaat, aasarlu naallugu immiunneqartut katiterneqassallutik.

- Saqqummersitsinerput siammarsarniarlugu Kalaallit Nunaanni Danmarkimilu assigiinngitsuni tusarnaartitseqattaassaagut, Miki Jensen oqarpoq.

Small Time Giantsikkut aningaasanik katersinerminni anguniagartik angunerani nuannaartut takuneqarsinnaapput (video takusinnaanngikkukku ugguuna takuuk)