Video: Rasmus Lyberthip ilisaritinnera
Rasmus Lyberthip videomi nipilersorneq aamma qalipaaneq soqutigilersimasani oqaluttuarai
Ilisarititsinermi nutaami Rasmus Lyberthip nipilersorneq qanoq aallartissimanerlugu aamma suminngaanniik isumassarsiaqarfiginerlugu ilaatigut oqaluttuaraa.
Ilisarititsineq qulequtaqarpoq 'Rasmus Lyberth - med nysgerrigheden som styrmand', tassa kalaallisut 'Rasmus Lyberth - alapernaassuseq aquttoralugu' oqaatigineqarsinnaasoq, tamanna umiartortuusimaneranut ilaatigut attuumassuteqartoq.
Kisianni aamma qalipaaneq qanoq aallartissimanerlugu oqaluttuaraa. Qalipaaffissat qalipaatillu uuliallit tunuarsimaarfiginikuullugit maanna nutaamik soqutigisaqalerpoq.
- Ullut ilaanni eqqumiitsuliortunngussaqqaarpunga. Taamaammanuna nutsakka tallisikkikka, eqqumiitsuliortutut isikkoqarusukkama, Rasmus Lyberth qungujulluni filmimi oqarpoq.
Filmiliaq Paalu Møllerimut aamma Hans-Peter Bayimut soraarummeerutigalugu misilitsissutaavoq, taakku sapaatip-akunnerata siuliani film aamma tv teknikeritut Viborgimi ilinniakkaminnik naammassisaqaqqammerput. Marluullutik KNR-imi suliffimmik misiliinertik ingerlannikuuaat.
Filmi ilinniartoqatititk Daniel Wagner aamma Jewan Sedo peqatigalugit immiussaraat.
Assi qulaaniittoq toorlugu filmi takuneqarsinnaavoq.