Qimmeq qimuttoq

Video: Qimmeq qimuttoq piviusulersaarusiarineqalersoq

Sisimiormiu arnaq qimussertartoq qimusserlutik alapernaarsuisartuni Siriusikkormiuni Tunumi ulluni tallimani filmilioreerluni uteqqammerpoq

Sisiormiu arnaq qimussertartoq, 27-nik ukiulik Navarana Lennert, Tunup avannaani Daneborgimi qimusserlutik alapernaarsuisartuni Siriusikkormiuni, Sisimiormiunit filmiliortunit malinnaavigineqarluni, ulluni tallimani tikeraarsimareerluni uteqqammerpoq.

Filmiliortut paasissutissiinerat najoqqutaralugu ilimanarpoq tikeraarneranit siullermit immiussat filmiliortut Issittumi qimmip qimuttup atorneqartarnera pillugu piviusulersaarummik filmiliariniarlugu pilersaarutigisaanni kapitali siulliujumaartoq.

- Nammineq aamma takorluugarivaa qimussernermik misilittagaqarnerulernissani, qimusserlutillu alapernaarsuisartut Siriusikkormiut tikeraarpai misigerusullugu qanoq qimminik passussisarnersut qimussertarnersullu.

Piviusulersaarummik filmiliorniartut tusagassiuutinut taama nalunaaruteqarput.

Assit takukkit: Iluliarmiut Avannaata Qimussersuanut piareerput

Alapernaarsuisussat piareersarneranni malinnaavigigai
Navarana Lennertip qimussertussat holdi normu 7 naapippai, taakkualu ilaatigut takutippaat qaammatit pingasut tikillugit angalanissaminnut qanoq piareersartarnertik, kiisalu atortut suut atortarneritik.

- Qimusserlutik alapernaarsuisartuni Siriusikkormiuni qimussertartut qimmitillu suleqatigiilluarput, qimussertullu qimmiminnut assut aqutsillaqqipput. Qimmit isumassorneqarluarput nerisilluarneqartarlutillu. Aamma qimussertut uumasut nakorsaannut toqqaannartumik attaveqarsinnaapput qimmeq Tunup avannaarsuani nunami eqqissisimatitami qaammaterpassuarni ingerlaarnerup nalaani persalissangaluarpat peeqqiilliuuteqalissangaluarpalluunniit, Navarana Lennert oqaluttuarpoq.

Atuaruk: Piviusulersaarut Arfernat kiisami angallanneqalerpoq

Inuit qimmiat piviusulersaarutitut
Navarana Lennert qimusserlutik alapernaarsuisartuni Siriusikkormiuni tikeraarnermini filmiliortunit inuit Tjukotkami, Alaskami, Canadami Nunatsinnilu qimminik qimuttunik atueriaasiat pillugu piviulersaarummik immiussiffiginiarlugu pilersaaruteqarfigisartik aningaasaliisussarsiorlugu qinnuteqaqattaaleruttortunit malinnaavigineqarpoq.

Johannes Ujo Müller filmiliornermi ilitsersuisuusoq, Pipaluk Lykke Løgstrup Nebulameersoq isumassarsisuullunilu suliaqartuuvoq.

- Arktisk Kommandop qujanartumik suleqatigilluarneratigut angalaneq iluatsilluarpoq, filmiortut taama ilisimatitsipput.

Nebula tassaavoq Sisimiuni suliffeqarfiarannguaq ataatsimik sulisoqartoq kulturilu pillugu suliaqartartoq. Nebulamit ilaatigut atuagaq Isi/Øje/Eye suliarineqarnikuuvoq.

Powered by Labrador CMS