AVAMMUT TUNISINIARNEQ
VIDEO: Minkit amiinik pisiortortartumut puisit amiinik tuniniaaniarneq
Arlaleriarluni Kinamut puisit amiinik tuniniaaniartoqartarsimavoq. Amerlanerpaat iluatsilluartaratik
Minkit amerpassui. Minkit amiinik Kinamut tuniniaaneq ingerlalluartorujussuuvoq - pingaartumik qallunaat amernik tuniniaanermik ingerlatsiviannut Copenhagen Fur-imut. Taanna Kinamik niueqateqarnermini ukiumut 13 milliarder koruuninik kaaviiaartitsisarpoq.
Great Greenlandip ullumikkut Copenhagen Fur suleqatigaa, ilaatigut Kinami tuniniaavimmut iserniarnermini. Kinamiulli amernik pisiortortarnerat allanngortinneqarsinnaava?
Video allaaserisap qulaaniittoq pillugu taamatut oqaluttuarpoq Mathias K. Nielsen. Mathias K. Nielsen Qaqortormiuuvoq, ullumikkulli Beijingimi najugaqarluni. Tassani North Atlantic Fur Groupimi piginneqataalluni sulivoq, ingerlatsivillu taanna Great Greenlandip siusinnerusukkut nunanut allanut tuniniaanermi suleqatigisimagaluarpaa, aaqqiagiinngilernermik tungaanut eqqartuussivilersuunnermik kingunilimmik.
Video Beijingimi immiunneqarsimavoq North Atlantic Fur Groupip Great Greenlandillu suleqatigiikkunnaanngikkallarmata.
Kinami puisit amiinik tuniniaaniarneq pillugu annertunerusumik Sermitsiaq normu 30-mi atuarsinnaavutit, taannalu ataani linki atorlugu aasinnaavat.