nannut
Video: Illoqqortoormiuni anaanaasup nannut ernumagisarpai
Marlunnik qitornallip nannumit takkuttumit illersoriarfeerussinnaanissani ernumassutigisarpaa
Ikinnerpaamik nannut aqqaneq marluk imminut illersorniarnermi toqunneqarput qaammatini siullerni qulingiluani, WWF Verdensnaturfondenip misissuinerata paasinarsitippaa, nittartakkami pingasunngornermi allaaserineqartareerpoq.
Imminut illersorniarluni nannut aatsaat taama amerlatigisut toqunneqarsimasut WWF Verdensnaturfonden nalunaarpoq. Silap allanngoriariartornera tassani pissutaaqataasoq WWF-imit biologi Charlotte Moshøj oqarpoq.
Charlotte Moshøjip Illoqqortoormiuniinnermini Lea Sanimuinaq Madsen marlunnik qitornaqartoq apersorpaa. Qitornaa angajulleq 1. klassimi atuartuuvoq pania meeqqanut paaqqinnittarfimmiittarluni.
- Anaanaasut tamarmik ernumagisarpaat qitornami arlaannik suneqariataarnissaat, Lea Sanimuinaq Madsen oqarpoq. Panini ullut tamaasa paaqqinnittarfiliaattarpaa.
- Illoqarfimmi nanoqariataarnissaa ernumagisarpara, immitsinnummi illersorsinnaajunnaariataarsinnaavugut taama pisoqassagaluarpat, oqaluttuarpoq.
Lea Sanimuinaq Madsenip WWF Verdensnaturfondenimit apersorneqarnera qulaani takuneqarsinnaavoq