Video: Ilisimatuut umiatsiaq pullattagaq atorlugu Nunatsinni timmisut

Ilisimatuut umiarsuaat Activ nunatta kujataaniippoq aasaq. Nunap eqqaani paasisassarsiorput.

Tatsiniilli tatsinut ingerlaniarneq ajornakusoorpoq. Tassanilu umiatsiaq pullattagaq timmisinnaasoq misilittarpaat.

Akikinnerusoq
Kalaallit Nunaanni ilisimatusarnermi umiatsiaq pullartagaq timmisinnaasoq iluaqutigineqarluarpoq. Aqqutimmi ajornakusoorsinnaapput, qulimiguulimmillu attartornissaq aamma akikitsuinnaanani. Qulimiguulimmimmi attartorneq akunnermut ataatsimut 30.000 koruuninik naleqarsinnaavoq.

Atortorissaarut timmisitsisinnaasoq umiatsiamut pullattakkamut ikkunneqarpoq. Taanna 80-ersorsinnaavoq suluilu 11,15 meteriullutik 250 kilollu missaani oqimaassuseqarluni. 3000 meterit pallillugit qullasissumiissinnaavoq.

Mikisuuvoq akikitsuulluni. Orsussatigut ulikkaaqqatilluni 150 kilometerini ingerlaarsinnaalluni.

Kalaallit Nunaata avannaani ilisimatusartilluni Jeppe Møhlip tamanna isumassarsiaraa. Tatsit ajornannginnerusumik tikinneqarsinnaalerput.

- Umiatsiaq pullattagaq timmisinnaasoq iluaqutaalluarpoq. Taannaqarsimanngitsuuppat sulinerput sivisunerujussuusimassagaluarpoq, Center for Geogenetikimit Kurt H. Kjær oqarpoq.

- Qilleriartornitsinni inuit marluk ilaasarput.

Kinngusinnaavoq
Assiliinikkut aamma umiatsiaq timmisinnaasoq atorluarneqarpoq. Narsarsuarmi imermik misissuisoqarpoq kiisalu aamma tatsit misissorneqarlutik.

Qaammatit pingajuat avillugu sulereernermi kingorna ajutuuallattoqarpoq. Umiatsiarmi kinnguvoq. Qujanartumik inunnik ajoqqusertoqanngilaq. Taanna pereermat kujataani sulineq aallarteqqippoq.

Video qulaani takuuk