Video: Eqqaavissuaq ulluni 60-ni ikumasoq

ICC-p ataatsimeersuarnerani arlaleriarluni pinngortitap mianerineqarnissaa eqqartorneqarpoq. Canadap avannaani Inuvimmi ataatsimeersuartoqaqqammerpoq. Ataatsimeersuartulli angerlamut ingerlanerminni killormoortuanik misigitinneqarput.

Kalaallit Inuvimmi ataatsimeersuaqataasut Nunatsinnukannginnerminni Iqaluk aqqusaaqqaarpaat. Iqaluit avataani eqqaavissuaqarpoq. Taannalu sivisuumik ikumanikuuvoq.

Eqqaavissuaq maajip 20-ani ikuallalerpoq. Illoqarfiup eqqaavissuaq ikumasoq innermik anitsisartumut eqqaanartutut oqaatigaa. Illoqarfimmi aqutsisunit ikuallattoq ingerlatiinnaqquneqarpoq.

Illoqarfimmi pujortitsisarnera pissutaalluni atuarfiit marluk matugallarneqarput, pujoq navianartoqarsinnaanera pissutaalluni.

Eqqaavissuaq 'Dumpcano'-mik innuttaasunit qungujunnartunngorlugu atserneqarpoq. Arlaat Twitterimi aamma taama ateqalertoqarsimalluni.

Qaminneqassaaq
Naak eqqaavissuaq pujortaraluartoq navianaateqannginnera oqaatigineqarpoq.

Iqalunni illoqarfimmi eqqiaanissaraluaq pujorpallaarnera pissutigalugu unitsinneqartariaqarsimavoq, eqqaavillu iliuuseqarfigineqarnissaa illoqarfimmi politikkerinit iliuuseqarfiginiarneqalerpoq.

Iqalunnili pisiniarfiit ilaat kiisa tujuuluaqqanik 'Dumpcano'-mik allaqqasortalimmik tuniniaasalersimapput, soqutigineqarluartumik.

Siunissami annertuumik eqqaavissuup ikuallannginnissaa anguniarlugu innuttaasut qinnuigineqarput eqqaavimmut pappilissat assigisaallu igitassanut allanut ataatsimoortinneqartassanngitsut.

Isummersortarfimmi Finding True Northimi allaaserinnittoqarpoq eqqaavissuaq suli ikummaarissoq juulip 16-ani.

Laakkuluk W. Bathory Twitterikkut juulip 24-ani ima allappoq:

'Seqinnertarunnaarpoq, naasut naajumajunnaarput isersimaannaleqqavugullu. Dumpcano peqqutaalluni matugut matoqqatittariaqarpagut, ilami tipeqaaq.'

Video qulaani takuneqarsinnaavoq