Vest Norden Travel Mart
Vest Norden Travel Award 2017-imi Colourful Nuuk ajugaavoq
Nunani avannarlerni takornariaqarneq pillugu saqqummersitsinersuarmut, Vest Norden Travel Martimut, ulluni makkunani Nuummi ingerlanneqartumut atatillugu, nersornaat ‘Vest Norden Travel Award’ tunniunneqarpoq
Suliniut 'Colourful Nuuk', takornarianut Nunatsinni illoqarfiit pingaarnersaannik nittarsaassisuusussaq, nersorneqarpoq.
Nunani avannarlerni takornariaqarneq pillugu saqqummersitsinersuarmut, Vest Norden Travel Martimut, ulluni makkunani Nuummi ingerlanneqartumut atatillugu, tamanna pivoq. Tassani Colourful Nuuk 'Vest Norden Travel Award'-imik nersornaaserneqarpoq, nersornaat Travel Trade Outbound Scandinaviamit tusagassiortunit angalasunit tunniunneqassaaq.
Kommuneqarfik Sermersooq nittartakkamini allappoq.
Tunniunneqarnerani ilaatigut pingaartinneqarpoq, Colourful Nuup tunngaveqarnerani nutaaliorneq suleqatiginnilluarnerlu – soorluttaaq takornariaqarnikkut siuarsaasut pikkorissaanerit, isumasioqatigiinnerit suliniutillu taaneqartut.
- Nuannaarutigeqaara ukioq manna Nuummi takornariaqarnikkut siuarsaanermik ataatsimut suliniuterput ajugaammat, Kommuneqarfik Sermersuumi borgmester Asii Chemnitz Narup, oqarpoq
Colourful Nuuk toqqarneqarnerani tunngavilersuutigineqarput:
- Colourful Nuuk – ilisarnaataallualersullu tunngaviliisui Sermersooq Business Council aamma Kommuneqarfik Sermersooq – ukiuni kingullerni ilaatigut Visit Greenland suleqatigalugit najukkami takornarialerisut takornariaqarneq pillugu ulloq naallugu pikkorissartitsisarnikkut arlalitsigut siunnerfeqarluartumik ilinniartittarsimavai.
- Colourful Nuuk upernaaq manna najukkami takornarialerisut 18-it Vestnorden Travel Martimi isumassarsianik nutaanik nutaalianillu ilusilersuisussat isumasioqatigiisippai.
- Ukiuni tulliuttuni illoqarfiit pingaarnersaannut eqqaanullu takornariaqarneq pillugu periusissiamik suliaqarnermut atatillugu Colourful Nuuk suleqataalluarpoq.