Vera maanna Upernavimmut atisanik katersuivoq

Vera siullermeerluni meeqqanut inersimasunullu Tasiilamiittunut katersivoq, aappassaanillu Qaanaami innuttaasut ikiorneqarput.

Maanna Vera annertuumik suliniuteqarluni pingajussaanik atisanik katersilluni, immikkoortiterilluni aamma atisat innuttaasoqatiminut pisariaqartitsisunut nassiunnerinut aningaasanik tapiissuteqartussarsiorluni aallartippoq.

Upernavimmi ilaqutariit maanna ikiorserneqarsinnaanissartik qilanaarisinnaavaat.

Atuaruk: Tunumut atisanik atornikunik karsinik 35-nik katersisimasoq

- Angalanikorujussuuvunga, takusaqarnikorujussuullungalu. Nunamilu sumiiffinni allani ikiorneqarnissamik pisariaqartitsisoqartoq taamaalillunga nalunngilara. Sumiiffiit katersissukkusutakka tikikkuminaannerusarput. Taamaammat pisariaqartitsinerat annertunerusarpoq, saniatigullu atisanik oqortunik pisariaqartitsinerusarlutik. Nuup nassiussiffigisartakkamalu assigiinngissusaat tassani takuneqarsinnaavoq, Vera M. Egede Sermitsiaq.AG-mut oqaluttuarpoq.

Immitsinnut ikiussaagut
Vera M. Egede ukiut qulissaanik timmisartuni saqisuuvoq, tamatuma saniatigut meeqqanut marlunnik pingasunillu ukiulinnut anaanaavoq. Taamaakkaluartoq allanut iluaqutaasussamik kajumissutsiminik sulinissamut nukissaqarluartarpoq.

- Suliffeqarnerma saniatigut mikisunillu meeraqarnerma saniatigut suminngaanniit nukissaqartarnersunga inuit aperikkajuttarpaannga. Tamanna naluara. Iliuuseqartoqarnissaanik soorlu misigiinnartarluni. Nunarujussuarmi tamatta kivitseqatigiilluta, sumiiffiit imaaliallaannaq tikinneqarsinnaatinnagit ikioqatigiissinnaasugut isumaqarpunga, Vera M. Egede kajumissaarivoq.

Tunumut atisanik nassiussineranit ukiup ataatsip missaa qaangiuppoq, taamanikkullu meeqqat atisaanik Tunumi anaanaasumut kisimiittumut tunniussassaanik puussianik taamani aallartippoq.

Atuaruk: Piniartunut aalisartunullu aningaasanik katersuiniarneq

Isumassarsialli ilusininneranit suliniut sukkasuumik alliartorpoq, Vera M. Egedelu timmisartukkut karsit 40-t ulikkaaqqasut Tasiilamut nassiuppai. Air Greenlandip nassiussinera aningaasaliiffigaa.

Umiarsuarmik kingullermik nassiunneqartut
Ukiup ingerlanerani nassiussat taama amerlatigipajaartut umiarsuarmik kingullermik Qaanaamut nassiunneqarput. Tassanilu Vera M. Egede aningaasaliisut aningaasartuutinut isumagitippai.

- Nassiussat tassani EMJ-Atconimit aamma OS elektronikimit aningaasaliiffigitippakka. Karsit tamarmik atisat nassiunnerani atorneqartussat Optimeramit aningaasaliiffigineqarput, kajumissutsimik suliniuteqartoq oqaluttuarpoq.

Maannakkullu atisanik katersineq - aningaasaliisussarsiorneq - aallarteqqippoq.

- Maani Nuummi inunnit annerpaamik taperserneqarnerpaavunga. Inuit atisarpassuarnik tunisilluarusunnerat nuanneqaaq. Nammineq suliaralugu soorunami artornarpoq. Kisianni piareerluni nassiukkaanni iluatsilluartuaannarpoq, misigissuserlu nuannertaqaaq, Vera M. Egede naqissusiivoq.

Tamatta atisanik atorfissaqartitsivugut
Maannamut pallet pingasut atisanik ulikkaaqqasut katersorsimavai, aammalu karsit pingasut Nuummi Enoksen Aps-mit pissarsiarisimavai.

Piffissamilu tulliuttumi atisanik suliniuteqarluni saniatigut sulisussaagaluarluni, Vera M. Egedep suliani nuannaraa.

- Atisat karsimut ikiorarneqarnissaat suliassarujussuuvoq, atorsinnaanngitsullu immikkoortinneri ilaalu ilanngullugit. Kisianni immaqa tamanna ileqqoriinnarpara; allat ikiorusuttorujussuuakka. Aamma ''atisaannarniugaluarpat''. Tassami tamatta pisariaqartippagut, Vera M. Egede oqarpoq.

Atuaruk: Røde Kors anorersuarmik eqqugaasunut 50.000-inik tunisivoq

Vera M. Egede Facebookikkut attaveqarfigineqarsinnaavoq.