Vædderinimi naggammik angalaneq

Iluatsitsinikkut sukkasuumillu aalajangernikkut, 23-nik ukiulik Natacha Petersen angunni ataqqinartumik inuulluaqquaa.

Martsip qaammataani Jesper Houlind 49-iinnarnik ukioqarluni tassanngaannartumik toquvoq. Tamatumunngalu pasitsannartoqarsimangilaq.

90-ikkunni umiarsuaq alapernaarsuummi Vædderinimi kampinformationsgastitut angalaqataasarsimavoq.

Kingornalu panini Kalaallit Nunaaniissimanerminik, piffissaq inuuneranut sunniuteqangaatsiartoq, oqaluttuarillattaasarsimavaa.

- Imarsuaq pinngortitarlu kusanagaaqisoq tassunga isumaqarluinnarsimapput. Tassanilu anersaartorluarsinnaalluni arlarleriarluni oqaatigisarsimavaa, Natacha Petersen Sermitsiaq.AG-mut oqaluttuarpoq.

Angummilu toqunerata kingorna, Natacha aalajangersimavoq angummi asaqisaa Kalaallit Nunaat ullut arlaanni nammineq misigisaqarfigiartussallugu. Arsaatalu ilai toqqorsimavai; arsaata ilai imaanut kuineqareersimapput. Jesper Houlindip oqaatigisarsimavaa taamatut kissaateqarluni.

Kalaallit Nunaanut angalaneq Natachap ilimagisaaniit pipallanneruvoq.

- Aalajangipallanneruvoq. Aasaq manna susassaqarpallaarsimanngilanga taamaattumik Savalimmiut, Island soorunalumi aamma Kalaallit Nunaanut tikeraassallugit aalajangerpunga.

Angummilu arsai illerfiusamiittut nassarpai.

- Soorunami aliasuuteqarnerup ilagaa. Qaangiinissara, neriuutigisimangaluarpara, arnaq inuusuttoq oqaluttuarpoq.

Kalaallit Nunaanulli tikinnermini suna tamarmi angummi oqaluttuarisarsimasaatut ippoq.

Natacha Petersen angalaarlunilu qimussernermik misiliivoq, taamaasillunilu kalaallit pinngortitaat qanimut misigisaqarfigalugu.

- Pinngortitaq kusaqaaq. Ataatamma oqaluttuarisarsimasaata asserluinnaanik misigisaqarpunga.

Nuummut tikinnermini paasilerpaa, Vædderen, umiarsuaq angummi ilaavigisarsimasaa, umiarsualivimmi talinngasoq. Tamannalu naatsorsuutigisimanngikkaluarpaa. Sivikitsuinnarmilu eqqarsariarluni iliuuseqarpoq. Umiarsuup naalagaa oqaloqatigiumallugu ikaarumasimavoq aperalunilu, ajornanngippat Jesper Houlindip arsai Vædderinimiit Kalaallit Nunaata imartaanut kuineqarsinnaanersut.

- Ilumut taama iliortoqarsinnaanera, naatsorsuutiginngilluinnarsimavara.

Issittumilu Sakkutooqarfimmut sianipallannikkut umiarsuup naalagataa, kommandørkaptajn Jesper Lyngep Natacha ikiorumallugu nalunaarfigaa.

- Ataatamma arsani Kalaallit Nunaata imartaanut kuineqarnissai toqqaannartumik oqaatigisimanngilaa. Kisianni soorlu oqaatiginngiinnarsimagaa.

Ullormilu tassani ualisoq Natacha Vædderinimut ikeqqippoq. Tamatuma kingorna umiarsuaq alapernaarsuut avalappoq Nuullu avataanut aallarluni.

Natacha umiarsuup qulimiguulinnut mittarfianukaanneqarpoq. Umiarsuup naalagaa inuttallu tallimat Jesper Houlindip naggammik angalanissaanik piareersimapput.

- Sakkutuutut ilassineqarnissaa naatsorsuutiginngilluinnarsimangaluarpara, Natacha oqarpoq.

Pisoq isiginnaartutut misigisimallugu, taanna oqaluttuarpoq.

- Ataataga qanoq oqarsimassangaluarnersoq eqqarsaatigaara. Qularinngilaralu kissaatigisaatut pinngortitamut uternini nuannaarutigissangaluaraa.

Taamaaliornerlu Jesper Houlindip anersaavatut ingerlanneqaraluartoq, Natacha Petersenip neriuutigisimasaatut, naggaserneqanngilaq.

- Inuusoqaluni tassanngaannartumillu toquvoq, uangalu 23-innarnik ukioqarpunga, sulilu aliasuutigeqaara.

- Kisiaanni aallartippara, taamaaliornikkullu aliasuuteqarneq killilertut ippara. Massakkut maqaasineq inituneruvoq.