aliasunneq
Uummatikkut aliasunneq angalarusunnerlu
Kalaallit Nunaanni sexologit kisiartaata nutaanik unammilligassarsiorluni illoqarfissuarmut New Yorkimut angalassamaarluni pigisani tamaasa tuninialeruttorpai – kisianni uummatimigut pakatsisimalluni
Ulrikka Holm uummatikkut aliasuuteqarpoq. Aappariinnut siunnersuisartoq atoqatigiinnermullu tunngasuni immikkut ilisimasalik ilisimaneqarluartoq allasiornermit suliffimmini akuttunngitsumik sammisartakkaminit nammineq eqqugaasimavoq.
- Kalaallit Nunaanni aappariinneq eqqarsaatigalugu ajornartorsiutigisatta annersaat tassaapput sangianneq/ningarneq allasiornerlu. Taakkua allanut sanilliunneqarsinnaanngitsumik asanninnermik aseruinerpaasarput, Ulrikka aapparisimasaminit avissaarneq ilungersunartoq aqqusaareersimallugu oqarpoq.
Maannalu annerusumik pilersaaruteqanngikkaluarluni nutaarluinnarmillu aallartikkumalluni New Yorkiliarniarluni aalajangerpoq. Ulrikka Holm qanoq ingerlanissaanik ilisimanngisaminik aatsaavissuaq aallartitaqalinngilaq. Inuusukkallaramili atoqatigiinnermut asanninnermullu tunngasut suliarinissaat pingaartilerpaa, taamaattumillu qallunaaq sexologi Joan Ørting ilinniarfigilerlugu. 2010-mi sexologitut aappariinnullu siunnersuisartutut imminut taasinnaanngorpoq.
- Uanga nammineq aappariinnerit ingerlalluartut aqqusaarsimanngisaannarpakka. Tamatigut sakkortuumik allanngorartuusarsimapput ilungersunartorfiusarlutillu. Taava tamanna eqqarsaatigilerpara, imminut pillunga, aappariinnerup peqqinnartup inuuffigisinnaalernissaa ilinniarniassagakku, Ulrikka nassuiaavoq, eqqarsalaariarlunilu ilassuteqarluni:
- Uanga imminut pillunga taamatut ilinniagaqarpunga. Maani taama atorneqartiginissara ilimaginngisaannarsimagaluarpara. Tupangaatsiarpunga, aamma ilinniakkama naammassinerata kingorna aviisimi allaaserineqarama.
Suliassallu Kalaallit Nunaannut nassarlugu angerlaannera oqitsuinnaanngilaq. Sexologitut taaguut inuppassuarnit – pingaartumik angutinit – toqqannartorujussuarnik saaffiginnissuteqarnissamut ammasumik qaaqqusissutitut isigineqalerpoq.
- Killissaqanngissuseq inuit ima allaannarsinnaallutik isumaqarfigisaat: Atoqatigerusuppagit. Imaluunniit taxanut ilaatillunga taxartartut atoqatigiinnermut tunngasunik tassanngaannaq oqaaseqartarnerat. Allaanngivippoq inuk sexologimit immikkoortissinnaanngikkaat. Tigunaveersaartarpakka, kisianni taamaakkaluartoq artornakulussinnaalluni, Ulrikka nassuiaavoq.
Suliaa qujanartumik aamma ajunngitsortaqarsimavoq Ulrikkamullu inuit takkuttartut ikiorsinnaanerat pingaaruteqarluinnarsimavoq. Pingaartumik aappariinnut siunnersuinermik suliaqarnini nuannarilluinnartarsimavai.
Ulrikkap sapeeqaluni qinigaanut tunngasut tamaasa Arnanut nutaami maanna pisiassaalersumi atuakkit. Aviisi ataani pisiarineqarsinnaavoq: