juullimut angallanneq

Uummanniartoq juulliaqqami apuutissaaq

Air Greenland Uummannamut/Qaarsunut Qeqertarsuarmullu juulliaqqami immikkut timmisartuussinissanik aaqqiivoq. Nunatta sinnerani angallassinermi pilersaarutaagallartut takukkit

Qeqertarsuarmi marlunngornermi silarlunnerata kinguneranik helikopteri kinguaattoorpoq aqagumullu pingasunngornermut kinguartiinnarneqarluni.

Air Greenlandimit ullumi marlunngornermi siusinnerusukkut nalunaarutigineqaraluarpoq Kulusummiit Uummanniartoq ataaseq, ullumi marlunngornermi Ilulissanut annguttussaq, aatsaat ataasinngornermi Uummannamut apuussinnaassasoq.

Kisianni Air Greenlandimit maanna nalunaarutigineqarpoq aqagu pingasunngornermi, juulliaqqami, Uummannamut/Qaarsunut Qeqertarsuarnullu immikkut timmisartuussisoqartussanngortoq.

- Tamanna isumaqarpoq ilaasup ataatsip ataasinngornerup tungaanut Ilulissaniittussanngoraluartup Uummannamut aqagu pingasunngornermi allakkat poortukkallu kingulliit angallanneqarneranni apuussinnaanngorneranik, Air Greenland taama tusagassiuutinut nalunaaruteqarpoq.

Atuaruk: Qeqertarsuarsuarmi silap peqqutigisaanik angallanneq kinguaattoorfiugallarpoq

Taamaattorli Qeqertarsuarmiit Qeqertarsuarmullu ullumi marlunngornermi silapilunnerata kinguneranik angallassinissaangaluit tamarmik aqagu pingasunngornermut kinguartinneqarput.

- Timmisartortartut, saqisut, mekanikerit usilersuisartullu tassa ulappupput ilaasussatta juullimut anngussinnaanissaannut, timmisartortitsileqatigiit taama nalunaaruteqarput.

Air Greenlandip juullikkunni angallassineranut nunap sinneranut pilersaarutai ima isikkoqarallarput:

  • Upernavimmit Kullorsualiartussat Nuussuarmukartussallu ullumi marlunngornermi aqagulu pingasunngornermi timmisartuunneqassapput.
  • Kulusummit/Tasiilamit Nuummiillu angalaniartut tamarmik marlunngornermi timmisartuunneqassapput
  • Ilaasoq ataaseq Nuugaatsiamit angalasoq silap peqqutigisaanik Københavnimut anngunneqarsinnaanngilaq. Angalasussaagaluartup angalanissani taamaatiinnarpaa.
  • Kujataani nassiussanik angallassinerit sisamat ullumi marlunngornermi ingerlanneqassapput.
Powered by Labrador CMS