Uummannami tunitsiveqarnikkut ajornartorsiutit ajornartorsiutaajuarsinnartut
Uummannami sulisussaaleqineq aalisartullu amerliartorneri pissutaallutik aalisakkanut suliffissuarnut tunisiniarneq ajornartorsiutaavq. Tunisinermi killilersuineq Uummannami aalisartut piniartullu peqatigiiffiannit naammagittaalliutigineqarpoq, aamma aalisakkanut suliffissuit aalisarnerup ineriartorneranut malinnaasinnaajunnaarsimasut, peqatigiiffik isumaqarpoq.
Royal Greenland Uummannami siorna aalisakkanut suliffissuaatiminik allilerivoq. Tassunga atatillugu qerititsiviit imerisinnaasaat 600 tonsimiit 1100 tonsimut annertusineqarput. Taamaakkaluartoq tunisinermi ajornartorsiutit anigorneqanngillat. Tunisiniartullu amerlavallaarneri pissutaalluni suliffeqarfik maanna killilersuisariaqalerpoq.
Aviisi Sermitsiaq taama allaaserisaqarpoq.
Siorna Nuugaatsiap Illorsuillu matuneqarnerisa kingorna, Uummannamut tunisisartut amerleriarnissaat naatsorsuutigineqareersimavoq. Taassumalu qaavatigut aalisartut illoqarfinniit allaneertut tunisisartut amerliartorsimapput. Ummannami aalisakeriviup aappaa, Avannaa Seafoodimit pigineqartoq, Royal Greenlandip ajornartorsiutaata asserluinnaanik ajornartorsiuteqarpoq.
Aalisakkanut suliffissuit aalisarnerup ineriartorneranut malinnaasinnaajunnaarsimasut, aalisartut piniartullu peqatigiiffiat, UAPP, isumaqarpoq.
Ajornartorsiut nassuerutigaat
Ajornartorsiutit qulaani pineqartut atuunnerat, Niels Ole Møllerip, Royal Geenlandimi ingerlatsinermut pisortaasup nassuerutigaa.
- Angallatit tunisiniartut imak amerlatigaat, tunisinissaat tulleriiaarneqartariaqarlutik. Aaqqissuussaasumik ingerlasariaqarpugut, taamaanngippat tattoqqilliuuttoqalissaaq. Aalisartut kujataatungaaneertut Uummannami aamma tuniserusuttarput. Taamaattumik tamaasa ataatsikkut sullissinnaanngikkigut takorloorsinnaavarsi, taanna oqarpoq.
Uummannami Royal Greenland suli sulissaaleqivoq. Sinerissamilu tamanna aamma ajornartorsiutaavoq. Uummannami suliffeqarfik allilerneqaqqissanngitsoq, Niels Ole Møller oqarpoq.
Tamanna pillugu Sermitsiami paasisaqarnerugit, uani ataani linki aqqutigalugu aviisimut isissutissarsisinnaavutit: