Ummannaq
Uummannami Inuiattut ullorsiorneq allaanerusumik misigisaqarfiusoq
Ajunaarnersuarmut eqqugaasunut inunnillu sisamanik ajunaarfiusoq Uummannap innuttaasuinit arlalinnit aliasuffiullunilu misiginneqataaffiuvoq
Inuiattut ullorsiorneq sila nillikujullunilu qulisimasoq Uummannami innuttaasut makiffigaat. Taamaattoq ullaakkut arfineq pingasunut kommunip allaffiata silataani erfalasuliinermi inuit 40-50-it missaanni peqataajartorsimapput. Takkussimasut kaffinik, tiinik kaaginillu sassaallerfigineqarput.
Malissuaqarnera ullup ataatsip ingerlanerinnaani inunnut 200-ut missaani angerlasimaffeerutitsisoq, takkussimasunit misigineqarsinnaallunili malugineqarsinnaavoq.
Najukkami erinarsoqatigiit Erinakkut, Uummannap nammineq erinarsuutaa 'Uummannaq' appimmassuk takkussimasut ilaat killitsisimaarput ilaallu qissallutik.
Sakiu Fleicheri Qaasuitsup Kommuniani kommunalbestyrelsimut ilaasortaasoq aammalu Ikaarsaariarnermut ataatsimiititaliamut ilaasortaasoq ukioq manna Inuiattut ullorsineq allaanerusumik misigisaqarfigaa.
- Ajunaarnersuarmit eqqugaasunut aammalu ajunaartunut sisamanut misiginneqataaneq ullumi ulloq nuannisaarluta atortakkatsinni misiginneqataanerput initunerujussuuvoq.
- Ullaaq erfalasuliinitsinni tamanna aamma malunnartinneqareerpoq, nunaqqatigummi ajunaarnaarsimasut sisamat ilaqutaannut misiginneqataanerput takutinniarlugu taamatulli nunaqarfimmi angerlarsimaffeerussimasunut misiginneqataanerput takutinniarlugu erfalasoq qiteqqullugu amuarput, Sakiu Fleischer oqarpoq.
Pisoq illoqarfimmiittunut tamanut attuigaatsiarpoq. Ataasinngornermi eqqaaniaalluni naalagiaqatigiinneq aliasuffiuvoq pisorli tamanit assut attorneqaatigineqarluni. Ajunaarnersuarmillu eqqugaasut ilaqutariillu asasaminnik annaasaqarsimasunut annertuumik misiginneqataasoqarluni. Sakiu Fleischerilu aamma taama misigisimavoq.
- Piffissami matumani iluamik sininneq ajorpugut. Uanga unnuaq manna iluamik sininngilanga, taamaammallu ullumikkut qasoqqalaarpunga, pisorli sakkortoqimmat taamatut qisuariaateqarneq naliginnaasuuvoq. Pisoq assorujussuaq sakkortuumik misigisaqarfiuvoq, tamatsinnulli sakkortuumik attortisimanarluni, Sakiu Fleischer ilaquttani ilagalugit Inuiattut ullorsiortussaq oqarpoq.
Inuuneq ingerlaqqittariaqarpoq
Berhe Andersen, malissuaqareernerup malissuaqaqqissinnaaneranillu aallaarisaarinermi Uummannami innuttaasut arlallit qaqqamut qimaasariaqarnerisa kingorna, Inuiattut ullorsiornermi toqqissisimanerulluni itersimavoq.
- Ulluni kingullerni iluamik sininneq ajorsimallunga, ullaaq toqqissisimanerullunga sivisunerulaamillu sinissimallunga iterpunga. Illoqarfiup qutsinnerusortaani illoqarpugut, taamaammat marloriarluni malissuaqarnissaanik aarlerisaarisoqarnerani arlalinnit qimaaffigineqarsimalluta.
Taanna qasoqqasimaqaaq arlaleriarlunilu qiasarsimalluni. Illoqarfillu malissuarmit eqqugaanissaa aammattaaq ernumassutigisimavaa.
- Innuttaasunik ataatsimiisitsinermi malissuaqaqqilissangaluarpat malissuup illoqarfimmut apuutsigani annikkinnerulernissaa nassuiaatigineqarmat assut eqqissiallaatigisimavara. Taamaammat unnuaq sinnilluarnerusimavunga, naallu ulluni kingullerni ingerlariaqqinnissaq ajornakusooraluaqisoq, inuuneq ingerlaqqittariaqarpoq, ullumikkulli nalliuttorsiornerni peqataarusuppunga, Berthe Andersen oqarpoq.