aallartisaaneq
Uummannami ineriartortitsinissaq siunertarineqartoq - ajugaasut takukkit
Aallarnisaanissaq anguniarlugu Greenland Setup Uummannami unammisitsivoq. Aallartitsiniarnissamut suliniartut sisamat ajugaanissamut unammillutik
Eqaarsaartarfeqalernissaq, pisiniarfeeraqalernissaq, aalisakkat pujuukkat panertitallu kiisalu umiatsiaq ilaasortaat.
Aallartisaanermut Uummannami Greenland Setupip unammisitsinerani eqqarsaatit arlaqarput. Greenland Setupip anguniarpaa illoqarfinni namminersortunik aallartitsiniaasoqartarnissaa, maannakkullu illoqarfinni assigiinngitsuni aallarniinissamut pilersitsiniartunik unammisitsilluni. Illoqarfimmi misilittagallit suliffeqarfimmillu aallartitserusuttut ujartorneqartarlutik.
Uummannami ingerlanneqarnerani inuit 13-it aallartitsisaanissamut eqqarsaatillit peqataapput, sisamanngorlutik avipput, eqqarsaatitillu qanoq piviusunngortinnissaat eqqartorlugit. Eqqarsaatitik eqqartoreermassuk illoqarfimmi suliffeqarfinneersunit apersorneqarput qanoq piviusunngortinneqarsinnaanersut.
Suleqatigiinneq
Uummannami arfinilissaa Greenland Setup aallartisaaniartunik unammisitsivoq, Uummannami innuttaasut peqataaffigisaannik.
- Misilittagallit uunga peqataanerat nuannerpoq, qanorlu eqqarsartariaatsit nikisilaarnerani alloriartoqartigisinnaanersoq takullugu nuannerluni, kiisalu qanoq piviusunngortikkusutat suut aqqutigalugit piviusunngorsinnaanersut aamma eqqarsartoqarnera nutaajulluni, Sara Heilmann Greenland Businessimi inuussutissarsiornermut siunersorti, Greenland Setupimi aallartisaaqataasoq oqarpoq.
Ajugaasut
Eqqarsaatit piviusunngortinneqarnissaanut unammissutigineqarput. Umiatsiamillu angallassisartussat naliliisunit ajugaasuusutut toqqarneqarpoq, ajugaasullu 5.000 koruuninik tunineqarput. Aningaasat aallartisaanissaminnut atugassarissavaat. Umiatsiaq takornarissanik angallassisinnaassaaq Uummannap eqqaani angalaartassalluni.
Qanoq Uummannaq illoqarfittut uummarsaqqinneqarsinnaanersoq pillugu suliaqartut naliliisinneqarput.
- Naliliinitsinni ilaatigut oqaatigaarput eqqarsaat illoqarfimmut ineriartuutaasinnaanera, takornarissammi ulluni amerlanerusuni illoqarfimmiissinnaalissapput, timersortarfik, pisiniarfiit neriniartarfiillu malunnaataatigisinnaasaanik, nalileeqataasoq Frits Overballe oqarpoq.
Illoqarfik tullinnguuttoq
Greenland Startup illoqarfimmi Tasiilami tulliani assinganik unammisitsissaaq, maajip 28-anit 30-at ilanngullugu.
Taanna pereeriarpat aasaru Narsami Sisimiunilu aamma aallarnisaanissamik eqqarsaateqartut periarfissinneqassallutik.