ammaanersiorneq

Uummannami ilaqutariinnut ikiorsiineq pitsaanerusoq

Qaasuitsup Kommuniani illoqarfinni kingullertut Uummannaq ilaqutariinnut illoqalerpoq

Isumaginninnermut ataatsimiititaliami ilaasortaq Jørgen Kruse, illumi aqutsisoq Uiloq Nielsen Motzfeldt aamma immikkoortortami pisortaq Nielsine Grønvold Petersen

Ilaqutariinnut ajornartorsiortunut Uummannami eqqaanilu pitsaanerusumik maanna ikiortissaqalerpoq. Tassami Uummannami ilaqutariinnut maanna illoqalerpoq.

- Tamanna pinaveersaartitsinermut suliniummut ilaasoq maanna inissinneqarpoq. Tapersersuineq, siunnersuineq ilitsersuinerlu maanna illoqarfinni arfineq-pingasuni nunaqarfiinilu maanna pisinnaanngorpoq, isumaginninnermut pisortaq Henrik Sóloy oqarpoq.

Ilitsersuineq aamma eqimattanik peqqissaaneq
Ilaqutariit atugarliortut siunnersorneqarlutillu ilitsersuunneqarnissaat, ilaqutariinnut illut siunertaraat.

- Uummannap immikkoortuani pisariaqartitsineq annertooq iluaqutsiiffigineqassaaq, isumaginninnermut ataatsimiititaliamut ilaasortaq Jørgen Kruse (S) sapaatip akunnerani kingullermi ammaanersiornermi oqarpoq.

Tamatuma saniartigut aamma meeqqanut inuusuttunullu eqimattanik peqqissaanernik assigiinngitsunik pilersitsisoqarsinnaavoq. Innuttaasunut tamanut ammasumik sapaatip akunneranut ataasiarluni siunnersuisoqartassaaq.

Uummannami tamatuma piviusunngortinniarnerata sivisuneranut pissutaavoq, illumik tulluuttumik nassaarniarneq ajornarsimammat.

Powered by Labrador CMS