Thursday, December 7, 2017 - 06:23

Uummannami ilaasut 100-t ingerlaqqissinnaanngitsut

Assi.: Kathrine Andersen
Uummannamit tassungalu angalanissat tamarmik tallimanngorneq ilanngullugu taamaatinneqarput, teknikkikkut ajornartorsiuteqarneq pissutaalluni.

Uummannami qulimiguulik ataasinngormat teknikkikkut ajornartorsiuteqalerpoq, maannalu silassaq malillugu kingoraartissat aatsaat tallimanngorpat tikinnissaat naatsorsuutigineqarpoq. Air Greenland tusagassiuutinut nalunaarummi allappoq.

Aaqqiissutissanik allanik misissuisoqarpoq
Ilulissaniit Uummannamut qulimiguulik alla atorlugu kingoraartissanik tikisitseriaraluartoqarpoq, kisiannili silarlunnera peqqutigalugu qulimiguulik uterpoq.

Aamma Uummannami eqqaanilu ilaasunik imaatigut angallassinissamut periarfissat misissuiffigineqarput. Mallit portusinnaanerat peqqutigalugu angallatit minnerit angalasinnaanngillat, aammalu sumiiffimmi angallatinik annernik ilaasoqarnissamut akuersanik soqanngilaq.

- Teknikkikkut ajornartorsiorneq taamaatitsinerillu tallimanngorneq ilanngullugu ilaasunut 100-inut eqquisussaapput. Ilaasussat tamarmik kingusinnerpaamik ullumi nal. 14.00 angalanissamut pilersaarummik iluarsisamik pissarsinissaat sulissutigaarput, Air Greenlandimi attaveqaqatigiinnermut pisortaq Katrine Hjelholt Nathanielsen oqarpoq.

Angalanissamut pilersaarutissaq nutaaq pillugu apeqqutissaqaruit Air Greenlandip callcenteria 70 12 12-imut attaveqarfigisinnaavat.

Seneste nyheder / Nutaarsiassat kingulliit